2025.09清遠鎮安古寺
2025.10.18 19:31
「師父，我都唔想麻煩 師父您老人家㗎！
我好慘，死得好寃枉。
師父，佢，呢個衰婆，真係衰到無人有，佢（嗰一生）問我借錢，話要幫佢老豆還債（賭債）。我一個打工仔，邊有咁多錢幫佢呀⋯⋯師父！
（善靈大哭。）
佢搵人同我講，話搵錢好易，幫人帶貨。原來，係毒物。我邊識呀！見帶咗幾次，真係搵到啲錢。我就好心，想幫佢。（搵到錢就借俾佢。）
佢恃住自己有幾分姿色，色誘我，同我發生關係⋯⋯我更加心軟。
師父，對唔住！多謝 師伯，多謝大家！
師父，我真係唔想麻煩您老人家，但我等咗好耐，等唔到⋯⋯
曾經，我真係想攞佢命，條衰婆，咁好彩，識得 師父，成日（好多機會）見到師父。我好矛盾，有時想整死佢，有時又唔想佢死得咁易，有時又想算啦！
師父，好多謝 師父！千多萬謝 師父！師父辛苦哂啦！
我唸，我都係時候放下。個衰婆有冇得救我唔知，但頭先 師父講法，我聽晒，聽得好清楚，好明白。而家 二哥嚟接我走喇，好多謝 師父俾機會！多謝 二哥俾機會！（二哥教講）感恩 祖師爺！感恩 伏英老師公！感恩 諸佛菩薩！（善靈下跪說）感恩 師伯，好感恩 師伯呀！感恩在場每一位！
二哥叫我唔好多講，把握機會，快啲走，蘇州過後冇艇搭。」
善靈再跪，向法玄叩頭後，跟著 二哥和 護法離去。
19:48
事緣
2025.10.18 19:00
師父應約到弟子家中晚飯，亞佩知道 師父到來，也把握時間到女兒家，人剛踏進屋，亞佩即禮貌地向 師父問好，然後靜靜的站在一旁。十數分鐘後，亞佩突然語氣「兀突」且帶點粗暴地大聲說：「師父我有嘢想同你講！」只見她身體畢直地站立着，眼睜睜的望着 師父。
師父慈悲地問她有什麼話想說？亞佩：「我總之想揾你！我都唔知咩原因，我成日都好想見你！」師父再問她有什麼想說，亞佩答：「我冇嘢講，喺度震。」她又斷斷續續地說，見 師父前的兩晚睡不到，「俾嘢磧（被鬼壓）」，「我係咁念佛，我就好想望見 祖師爺個像，但我望唔到⋯⋯」亞佩說着說着，漸見虛弱。
師父指示弟子找來有背靠的椅子給亞佩坐下。
其間，師父「看」到有一男靈體跪在亞佩身旁位置。
師父開示亞佩要堅持，「有緣認識佛法，認識 祖師爺，透過做功課喇，誦經做迴向喇，一切都要放下，慢慢會好。你有嘢想講嘅，或者其他眾生，有緣嘅眾生，有嘢想講，比一次機會，要講就講，唔講就要走喇！」
亞佩雙手靠在椅子扶手上，軟弱地癱坐着，神情呆滯，只說：「我唔知講乜⋯⋯我淨係好想揾你⋯⋯」
過了一會，亞佩問：「唔知點解我成日都係咁？」
師父：
「過往生好多時唔係（只得）一生，喺好多生裏面，有心、無心做左錯既嘢，（害咗人，受害人若果不放下，離世之後成為寃靈，要向寃親討債)。其實眾生（寃親債主）都好想有人幫，如果你唔做功課，有冤緣嘅眾生就攞唔到好處，就會繼續唔放下；當你有做功課嘅時候，佢又覺得唔夠，甚至有時候真係驚你做得好，攞唔到債。所以我哋都要繼續努力，我哋每個人都要做好自己。
祖師爺比機會我哋，諸佛菩薩比機會我哋，我哋自己都要爭氣，第一，要放下，過咗去嘅嘢就俾佢過去，太執著都係於事無補。機緣嚟到喇， 祖師爺俾機會就珍惜呢個機會，放下，然後去應該去嘅地方。
我們而家仲喺人道一日，我哋就要珍惜，要繼續努力，喺自己嘅能力範圍之內做好自己，放低自己嘅執著，同埋妄想。」
亞佩打斷：「而家好似有嘢拉住我⋯⋯拉住我⋯⋯想要我走咁⋯⋯」
師父：
「係㗎，因為欠債還錢呀！自己唔知自己做過啲咩嘢，因為咁多生咁多世⋯⋯可能係無心，又或者係有心但唔覺意做咗比較嚴重既錯事，傷害咗眾生，自己當時唔知，到投胎去人道，或者幾次輪迴之後，記憶已經唔存在喇，但係受害嘅眾生呢？佢就有苦難說，（有時）佢寧願放棄投胎做人嘅機會，就係要攞債，攞到為止。
當佢遇到你嘅時候，可以咁講，佢就係想攞命囉，但係上天係慈悲嘅，唔係話佢想攞命就比佢攞，加上我哋都係有緣，知道要誦經， 祖師爺比機會我哋，我哋要修、要學道、要學佛、要做功課，但有時怨親債主唔係一下子就可以接受到，『你做功課就放你一馬』，唔係咁容易。其實怨親債主都希望， 祖師爺比機會，或者入《晴明錄》喇。頭先我以為，比機會佢（指該男靈體）講喇，但又唔得，或者佢唔想啦，講與唔講都矛盾，又可能一匹布咁長⋯⋯
誠心懺悔係好重要。
點樣叫誠心懺悔？
好簡單，譬如有人好嬲好惡咁望住我而我唔知咩事，好多時我哋會話，『我唔知喎，我冇得罪佢喎，同佢講對唔住？（語氣帶點嬲怒地說）咁對唔住囉！』我哋咁樣講，對方接唔接受呢？唔接受。
『⋯⋯但我記憶中，我冇傷害過你，我冇整親你，或者踩親你，或者得罪你，冇！記憶裏面冇！又要我講對唔住⋯⋯（帶點晦氣地說）對唔住！』咁樣對方都係唔會接受呀。
誠心懺悔，就係話，『我唔知曾經係有心或無心，幾時傷害咗你？我好真誠同你講，對唔住，請你原諒我。』咁當然啦，誠心懺悔有時都係講緣分，當一個人嘅緣分到，佢會做到好深心裏面嘅誠心。
好多時當事人都覺得自己冇做錯嘢，點解瞓唔到？點解成日發惡夢？點解有個怪病？或者點解會發生了一啲好唔如意既事？
唯一解釋就係喺過往生裏面，有心無心，做左錯事自己唔知，多生輪迴自己都唔記得，但係冤親債主會記得呀！佢會認得你。離遠一眼就認得你，因為佢要報仇。
所以要珍惜呢一生，無論我哋（呢生人仲）有幾多時間，要好真誠（做人），因為我哋能夠遇到 祖師爺呢個法門唔容易㗎，能夠知道食素好，知道要誦經，要鈔經，呢個人已經好有福喇，因為聽到，不單聽到，同埋有做，我可以話比大家聽，前生已經好有福㗎喇。
可能你仍會問：『好有福？但點解我又經歷呢啲唔如意嘅事？同埋好似成日俾靈體滋擾？』
咁冇辦法，多生輪迴，因為一啲原因，有心或無心傷害咗眾生，攞咗佢命，或者令到佢係家破人亡，自己唔記得，唔知道，但係冤親債主就唔會忘記。
所以唯有就係繼續做好自己既功課，求 祖師爺、求 伏英老師公、求 諸佛菩薩加持，俾機會，同埋誠心懺悔：
『希望多生嘅冤親債主，我唔知我咩原因，有心定係無心傷害咗你，而家我好真誠咁同你講，對唔住，請你原諒我，亦都希望你放下，因為放下先有機會可以超脫。如果我所做嘅功德：誦經呀，鈔經呀⋯⋯如果係有（真）功德，我願意將呢個功德迴向俾你。祝你可以早日超昇，或者去到佛法界。』
（亞佩）你而家個情況係咁，你接受唔接受都好，呢段時間你要真誠懺悔，迴向俾眾生，希望佢哋可以放下。其實唔係只係事主慘，或者事主嘅家人慘，受害眾生都好慘，佢哋都好痛苦㗎，乜都唔要丫嘛，淨係要跟住呢個人。所以當你見到師父，（寃魂）佢哋即刻要投訴。
趁仲有時間，個人清醒、理智、健康，就認真地做功課，懺悔，同埋求生淨土⋯⋯要誠心求 祖師爺、伏英老師公、諸佛菩薩⋯⋯希望今生做嘅功課，同埋得 祖師爺加持，呢一生完左之後，去淨土⋯⋯求 祖師爺加持（自己），求眾生原諒自己。
問題就係，當怨親債主嚟嘅時候，好多時好多人淨係識得驚，或者埋怨，『我都唔識你，點解你要搞我？』或者，『我有念佛，點解我念咗佛，都係咁樣？』『我有做功課㗎，都冇用嘅！』咁佢就會沉醉喺嗰個局度，個局就係同嗰啲怨親債主喺度拉扯，咁係好難會出到嚟，最後只會去唔好嘅地方。所以有啲人喺臨終時，唔能夠成道呀，唔能夠超脫呀，原因就係埋怨。
我哋轉念諗吓喎，可能真係曾經害咗好多人，又或者，有時可能（件錯事）唔係好嚴重，只不過嗰位怨靈，佢睇到件事好嚴重，同埋佢已經放棄咗好多輪迴嘅機會，所以佢個怨恨心會好重。
解鈴還需繫鈴人，自己個冤結要自己解。
前生做錯事嘅原因追查唔到㗎喇，佢咁怨恨，要揾到埋黎，一單又一單嘅話，唯有就真係要誠心同冤親債主懺悔，請冤親債主原諒，請冤親債主放下，亦都希望冤親債主可以去到好嘅地方，要祝福冤親債主，（事主自己都）唔好怨恨。
阿佩，而家有冇好啲呀？如果下次 師父過嚟嘅時候你又放假，可以返到館，去館上香叩頭，要多啲親近壇，親近我哋 祖師爺。
（師父對弟子說）我哋好有福，就算你個壇係供奉壇，都係壇，供奉壇都係有緣先可以（設置），就要乖乖囉，唔好淨係話，『我好想設壇，設完壇之後，又想點⋯⋯又想點⋯⋯我想得好多嘢⋯⋯唔好咁樣諗呀，能夠冇病冇痛，一家人齊齊整整，好有福㗎喇，係咪呀？喺經歷裏面，人生裏面，婚姻呀，或者工作呀，或者健康，有好多嘅經歷，但我哋都要用一個平常心去看待，用感恩心去睇，『我已經好好彩喇！』
（最後 師父對阿佩說）一步一步嚟啦，係呀！加油！」
19:17
註： 師父接收善靈個案時，亞佩仍然癱坐着，雙手仍靠在椅子扶手上，頭卻垂到肩膀，雙眼緊閉，狀似睡着，但卻不時點頭，並斷斷續續地說：「嗯⋯⋯嗯⋯⋯」當 師父接收完畢，亞佩漸見清醒，她抬頭望着 師父，突然，極速從椅子滑落，雙膝跪下，身體趴在地上，叩頭給 師父，以表感恩之情。
延伸閱讀
《晴明錄》我係陳福水
《晴明錄》我係陳福水個家姐
《晴明錄》我係陳福水個家姐嘅同鄉 真正功德係誠心懺悔
《晴明錄》 自己因果自己孭返
《晴明錄》沙膽標：如果有來生，我唔會再做壞人
215 total views, 1 views today