《晴明錄》我係陳福水個家姐

 

 

2023年4月27日 09:34

 

 

「老師,我係而花,唔係,係明花,唔係,係⋯⋯

 

係,算喇(唔記得),係亞花。

 

我係陳福水個家姐,我細佬其實真係好乖㗎。我哋兩姐弟相依為命,父母好早就死咗。嗰時我都好細個,唔知父母點樣死,點解會死,留低我哋兩姐弟。所以我哋一直都以為佢哋係病死。

 

我大約幾歲,好細個,連照顧自己都唔識。但命運就係咁樣,應該有父母照顧同愛錫,冇不特止(不但沒有),仲要照顧一個未戒奶嘅細佬。

 

都唔知點樣,我哋就係咁大個咗(長大)。

 

老師, 師父,好多謝你幫咗我細佬,救咗我細佬!佢而家好好,我知道。佢,跟 二哥走咗(一段日子)之後, 二哥好好人,真係好好人。(二哥)佢帶我細佬陳福水嚟搵我。

 

我當時(神智不清)喺(另一空間)一條好長好黑嘅隧道裏面,呢,係 老師成日去(幫人)嗰條隧道呢。不過,我無緣分被 老師你見到。

 

二哥帶我細佬嚟,我當時呆呆濟濟, 二哥叫我幾聲,我仲喺度迷下懵下,抬起個頭,都唔知神仙駕到,更唔好講話認得番個細佬([陳福水])。

 

二哥神仙好好人,佢揮動一下塵拂,我就好似飲咗迷魂湯後飲番解藥咁,即時醒番。

 

我醒番之後,第一眼唔係見到細佬,係好驚訝點解自己喺度? 呢度係邊度?好驚好驚,失魂落魄咁。

 

然後, 二哥菩薩再揮塵拂,我成個定晒,唔驚喇!唔係,係仲係好驚,點解我個細佬會生勾勾(活生生)企喺我面前嗰度嘅?佢唔係死咗㗎咩?點解嘅?

 

我(當時踎低)退咗幾步,黐實埋牆,好驚好驚。點解咁奇怪嘅?我一路都好掛住個細佬,佢出事之後,我一路都想見番佢,好想救佢。點解見到佢冇穿冇爛,我仲驚過見鬼咁嘅?我真係無良心,真係好衰(見到細佬都驚)。

 

對唔住, 師父,阻你!

 

師父,我見到細佬之後,驚完之後,二哥同我講:『你細佬好想見你,有嘢想同你講,(仲好)想(二哥)我幫你。』

 

師父,係,我細佬俾個相好陷害,死得不明不白,我好恨佢(個女人)。點解我知佢係俾人害嘅呢?喺因為我知道細佬同嗰個女人一齊好耐,細佬好鍾意佢。其實我唔知細佬做咩(工作),我問過幾次,但佢淨係話『打工囉,咩都要做囉!講俾你聽你都唔知,講你都唔明㗎喇!』

 

因為(長大後)我同細佬(分開生活)唔係成日見,好耐見一次,(每次)佢都會俾一大筆錢我,大約(俾嘅錢)係半年,有時係一年工資咁上下。我有問過細佬,咁大筆錢點樣嚟(來源),佢話儲(蓄)番嚟。我同佢講,我哋可以窮,可以俾人睇唔起,但千祈唔好做壞事,會有報應㗎!

 

細佬話:『傻啦,你咪當個細佬唔識嘢啦,我梗係知啦!啲錢係辛苦錢嚟㗎,儲(蓄)番嚟㗎,有血有汗㗎!你袋住佢慢慢使啦,唔好飯又唔食,衣服又唔買,咁慳做咩喎!你細佬我而家學人做生意,如果做得成一單大買賣,我就同我老婆,帶埋你一齊離開呢個衰地方。』

 

我問,乜你幾時結咗婚?點解我唔知嘅?細佬話:『(結婚) 遲早嘅事喇!我而家有家有主,個女人好錫我,我好愛佢,我哋諗住搵到一筆⋯⋯我話,我哋諗住做得成一單大生意,我哋搵過一個無人識我哋嘅地方,過新生活,過好日子。呢,上次(幾個月前),我見你嘅時候,企喺街角,你望咗佢幾眼,問我係咪一齊嚟,問我喺咪你嘅同行,(問我)係咪相處緊。』

 

對唔住, 師父,(我)越講越遠!

 

係無見細佬一段好長日子之後,我四處搵佢。當然,係搵唔到啦!我就諗,唔通細佬做生意,臨急臨忙出外,嚟唔切話我知?(我)同自己講,無事嘅,細佬咁醒目,無事嘅,做成單生意就返嚟搵我,無事嘅,無事嘅。

 

又過咗一段時間,仲係未有消息,我淨係聽過細佬話喺邊度邊度住,正式住邊我唔知。嗰個,細佬話我見過嗰個女人,叫咩名,有冇做嘢,喺邊度做嘢我都唔知。原來,想搵一個人,都唔容易。同埋一個地方生活,唔好講(所在地方)大定細,突然間無消息,好似人間蒸發咁,真係會咁。

 

又過咗好耐,都唔記得係一年定幾耐,平時幾個月都會見一次,一個咁親嘅人,突然斷咗聯絡,冇晒消息,你話(相依為命)做家姐嘅,唔驚就假。

 

後來,完全無晒辦法,唯有去求神問卜。走咗去一間(當地)人人都話好靈(驗)嘅廟,觀音廟。問咗支簽,話(搵人)凶多吉少,係下簽。

 

我好驚,問解簽先生,可以點做。佢話:『簽文所講,都要有(心理)準備,自求多福喇!希望好心有好報,大步擸過。』

 

我聽完解簽先生講,好似淋咗冷水咁,成個人凍咗一大節,成個人呆咗,腦裡面冇晒嘢,一片空白。行去添香油,再上香。成個人好似遊魂咁,呆呆滯滯,幾步路都好似行咗好耐,都行唔出去咁。

 

就當我傻傻呆呆咁行落山嘅時候,菩薩有靈,我離遠見到嗰個人,嗰個女人(身邊有個高大英俊瀟灑嘅男人,好親密咁),(曾經)同我細佬相處嘅嗰個女人,但佢唔同咗,衣着亮麗光鮮咗。我即時追上去,但唔見咗人,唔見咗佢。我(喺附近)四圍搵咗好耐都搵唔到佢。我就諗,唔通我睇(認)錯人?唔通唔係佢?係嘅,無理由嘅,細佬講到佢哋咁相愛,細佬(離開生活地方)去做生意,佢哋應該係(喺埋)一齊嘅,係我眼花睇錯啫。

 

師父,對唔住,越講越長。多謝 師父用神聽我講!

 

二哥話精簡啲講, 師父好忙,太用精神。二哥話:『俾咗機會,就一定會幫我哋,師父好慈悲。』

 

簡單講,係我雖然同自己講,無事嘅,細佬無事嘅,唔好自己嚇自己。又同自己講,嗰日見到嗰個,成個少奶奶咁(應該唔係佢)。係自己睇錯,唔好再諗咁多。

 

又隔咗好耐,我又見到嗰個女人,離好遠。我今次搏命咁走上前,我問佢我細佬喺邊,點解咁耐無消息。佢好淡定咁,話我認錯人。我同佢講我見過佢,細佬講過佢喺(細佬)佢老婆,我唔會認錯。我拉住佢(猛咁搖佢),叫佢帶我去見細佬。睇上去穿戴光亮嘅少奶奶,突然變咗樣咁(露出惡相),話唔識我,問我係咪精神錯亂。

 

好多人圍上嚟,有人問使唔使報官。嗰女人話,無事無事,係誤會,係佢認錯人。

 

我聽到佢咁講,直覺覺得佢就係嗰個女人,無錯,係佢。我死拉住佢件衫,叫佢搵我細佬出嚟。佢由鎮定開始變得有啲驚咁,同我講真係認錯人。我話如果唔帶我去見細佬,我就一直跟住佢,點都唔放手。

 

拉拉扯扯一段時間,剛有官兵經過,問我哋咩事。個女人即刻話『無事無事,我哋識嘅』,我即刻話:『係呀,我細佬同佢一齊(生活),而家唔見咗。』

 

官兵(郁吓手)就話:『咩事,返衙門先講』。個女人(即刻)同其中一個,行埋一邊,見佢同個官兵講咗兩句,隻手郁一下。個官兵就(行番埋嚟)講:『無事就走喇,唔好喺度擋路』,示意那幾個隨行(兵)走(唔好理我哋)。

 

個女人即刻改變態度,轉口話:『呀你係咪亞福嘅家人呀?』然後(扮)喊住講:『我都唔知咩事,亞福同我嘈咗幾句,話睇見我就煩,叫我唔好跟住佢,以後各行各路。我係咁喊,問佢點解咁對我? 佢話對我冇晒感情,叫我唔好再問,仲話佢而家鍾意咗第二個女人,要同佢相宿雙棲,叫我唔好跟住佢,唔好搵佢。』講完就即刻走,拉都拉唔住。

 

師父,我好怨,好恨(個女人),(我)好掛住個細佬。但從此之後,我雖然冇停過搵(細佬)佢,但係始終冇晒消息,漸漸心灰意冷,估計(細佬)兇多吉少。

 

從此之後,我個人時時精神恍惚,漸漸仲捱出個病,過咗幾年之後,我就不在人世。臨死之前,我就響個心裏面同細佬講,『細佬呀,家姐而家嚟搵你喇,你唔使驚呀,我哋好快就見㗎喇,你等我呀!』

 

但原來唔係咁容易再見。我死咗之後魂魄四圍遊,四圍去搵細佬,不但搵唔到佢,仲時時俾啲惡鬼虾(欺負)。我越嚟越恨嗰個女人,我(同自己)講過無論佢去到邊,我都會纏住佢,唔會放過佢。

 

就係 師父(大圍)開館(設法壇)嗰日,我一路跟住佢,去到慈惠堂,門口有道好強嘅光,照到我魂魄唔齊,守門將軍唔俾我入。我即刻縮到好細好細,黐實佢個肺,寧願魂飛魄散,我都要入去告狀。

 

點知, 伏英老師公塵拂一揮,我就魂不附體,彈開九丈遠。 師父,我唔想㗎,我只係深深不忿,想告佢狀啫。點知,彈咗出嚟之後,我傷得好重,知道無得留低,但又唔忿氣走,我就係巷仔等佢,唔信佢一世唔出嚟。

 

俾我等到佢出嚟,點知佢成身都係符咒, 光殘殘(刺眼),我無辦法埋身,(我)唯有等機會(再攬佢)。終於,等咗好耐,我跟咗佢返屋企。我得閒就搞下佢,搞到佢瞓唔着,搞到佢頭暈頭痛,不知(幾)咁開心。

 

師父,我入唔到廟,又入唔到壇,投訴無門。我曾經問過土地(神), 點解個天咁唔公平?好人冇好報,嗰啲衰人就可以做人,我哋就做鬼都唔靈(驗)?

 

土地(神)好慈悲,好有耐性同我講:『善有善報,惡有惡報;若然未報,時辰未到』。叫我俾心機(守規矩)做好啲,始終會等到有機會嘅。之後, 土地(神) 仲教我:『做好心,做好啲,要修心養性,要幫人;但係幫人之前就要幫自己,要乖乖地唔好搞搞震。』

 

我要報仇,為細佬報仇,所以我聽土地(神)話。點知,潛移默化,我漸漸冇咁怨恨,但係心仲唔放得低。

 

今次,( 二哥帶嚟,俾我)見返細佬,好多謝 二哥菩薩!多謝 祖師爺,感恩 祖師爺!二哥教我講嘅。多謝 二哥!

 

係, 師父,我叫做亞芬(唔係亞花)。

 

而家知道細佬跟住 二哥,又去咗報到,等機會投胎。如果真心懺悔,真係做得好,嚟緊,細佬就可以唔使投胎做豬,改為投胎做人,做個窮人,一世冇出頭;因為前生呃得人多,係報應,係因果。
我而家有機會(跟 二哥)嚟見 師父,係想求 師父,求 祖師爺俾機會我細佬,(希望細佬)有機會做人,唔好咁辛苦,希望細佬有機會學道,重新做人,唔好再呃人,唔好偷呃拐騙。

 

 

感恩 祖師爺!
感恩 伏英老師公!
感恩 菩薩!
感恩 二哥!
感恩 師父!
好感恩!
如果有機會,我都想跟 二哥,都想跟 師父學道。真係好想,好想!」

 

12:54 畢

 

 

延伸閱讀

《晴明錄》我係陳福水

 

 

 337 total views,  1 views today

 

Others Post...