2017.03.05 澳門總壇 聚盈軒
事主：亞娣；多年前移居英國，因被靈體騷擾，於當地求助不果，其後有緣認識 師父，向 師父求救。
靈體：亞滿；事主先老爺。
地點：澳門總壇聚盈軒。
在場： 師父、法尊師兄、法然師伯、弟子法錦、法落、法今及善信亞冰。
壇前， 師父站立面向亞娣，法尊師兄側身站立向着亞娣，亞娣面向壇雙腿屈膝，跪坐在地上，雙眼閉合。(全程亞娣基本維持跪坐地上和閉目)
師父：係咪呀？（ 師父以心默語與事主交流）
亞娣：(點一下頭同時肩膀向上伸縮了二下，雙眼緊閉着，肯定的答)係！
師父：咁你係咪有嘢想要求呢？想點樣做呀？你喺法壇度要有禮貌，一句一句慢慢講出嚟，你想點樣呢？（ 師父見靈體借事主肉身說話，粗聲大氣，提醒靈體注意禮貌。）
亞娣：(仰起頭，雙眼仍緊閉着)我想佢都係(要)為人民。
師父：為人民？嘿！唔係由你哋做決定㗎，啱唔啱？
亞娣：唔係喎……(雙手手掌向上交疊着，放在眼前，作看書狀，雙眼仍緊閉着)唔係喎，(手指繼續對疊雙手向前伸直)佢以前幫人家做過個喎！
師父：係咩？
亞娣：(肯定地點下頭)係！
師父：亞娣頭先無同我講喎，無同師父講喎。
亞娣：好耐之前，唔係呢兩三年，好耐好耐之前，(好大聲強調)，十幾廿年前！
師父：哦……
亞娣：好！我依家(雙手交疊手背向上，輕輕碰了碰額前)擺明同你哋六壬師傅* (跪直身子，雙手伸直，合掌指向壇)……大家，官官相衛，我都……係師爺！(雙手拍拍胸前，「嘔」了一口大氣，手臂打開雙掌向壇)
(*六壬師傅：此處靈體所指的是 六壬祖師爺。)
師父：你都係祖師爺？
亞娣：(點頭)係，我都係 (右手拍住心口)盧家嘅師爺！
師父：羅家嘅師爺？
亞娣：盧家嘅師爺！
師父：咩家呀？聽……
亞娣：「盧」，「盧家師爺」(拍了一下手掌)，嘻，正話（剛才）嗰個呢(另一個靈體)，跟佢嘅。
師父：唔，而家就另一個「盧家師爺」。
亞娣：(「嘔」了一口氣，攤開手掌然後交疊)我依家呢個呢，正式呢，「盧家師爺」。
師父：唔……
亞娣：(拍了一下手掌，頭往上仰了一下) 嘻，(再拍一下手掌)，Sorry，正話(剛才)入嚟冇同你打招呼，我依家「盧家師爺」同你打招呼，(合掌拜拜，笑着)，六壬師傅*，嘻嘻，咁多位菩薩。
(*六壬師傅：靈體所指的是 六壬祖師爺。)
師父：咁樣喇……
亞娣：(打斷 師父說話)妳都見過我嘅(向着 師父說)，官官相衛。(合掌向 師父拜拜)
師父(笑)
亞娣：嘻呀，嗱，今日妳幫我……媳婦吓，叫做媳婦，(作大聲聲明狀)呢 個 亞 娣(以右手食指戳向胸口)！係 我 個 心（新） 抱！等如媳婦！今日由妳幫佢，妳可能幫到佢，攪番掂呢「壇」嘢，明唔明白？可能中山話你唔識聽，(拍拍心口)，唔係亞娣講，我「盧家師爺」講！
師父：祖先講，係咪？
亞娣：師爺！
師父：哦……師爺……點解講「師爺」呢？我唔明。
亞娣：師爺，唔明吓？
師父：可唔可以慢慢解釋一下。
亞娣：好！(亞娣全程雙眼緊閉，雙手配合說話不斷揮動)一匹布咁長，講俾你知。(亞娣拍拍手掌，再跪坐地上)
師父：使唔使坐呀？
亞娣：(搖搖雙手)唔使！有禮貌(左手手掌交疊右手手背，拜了三拜)，多謝吓！
師父即向 祖師爺合十，一拜。
亞娣：我呢個媳婦，之前，十幾廿年前，喺大陸，中 山 小 欖 九 州 箕 客 豐 南 村 1 巷 1 號 門 牌！(亞娣邊拍手打拍子，邊字字鏗鏘逐個字大聲讀出)，開過一個壇！好似你咁，幫人，為人民！(雙手大力拍在地上)為吓為吓，佢自己逃避唔想做，走去英國！(雙手拍地，然後緊握拳頭)
師父：你唔好咁激動……
亞娣：我好激動(右手掩住心口)，我今日好心痛……
師父：點解呢？
亞娣：(雙眼緊閉，哭腔)你聽我講 (右手向 師父伸了一伸)，嗚……嗚……點解今日我個心（新）抱攪成咁，咁多災難(雙手拍地)、病痛(雙手拍地)，我話 (每說一句都雙手拍打大腿或拍打地面)……都唔係我一個話嘅……其實都有菩薩，要佢為人民……觀世音菩薩，玉皇大帝，成日都要佢為人民……我呢，以前喺大陸，都係擔過大旗嘅(舉了一下大拇指)，我以前……生前，在生之前，都係做幹部嘅(舉起大拇指)，做村幹部，一個唔小心(雙手揮動)……(泣)我個家姐，香港人，叫「亞鳳」，叫我起樓(建屋)，比一筆錢我，我自己慳番筆錢，去「x沙」(地方名)，同我依家呢個亞娣，我心(新)抱個老公……
師父：個仔，即係自己個仔。
亞娣：係呀(點一下頭)，同我個仔一齊去「x沙」，好唔好彩，我個仔逃生咗，我……沉……沉落大海……(雙手向下不停擺動，泣不成聲。)
師父：即係你個仔……
亞娣：我個仔逃生咗……
師父：逃生咗，無事。
亞娣：係呀，逃生咗，(泣)我呀……沉落大海……
師父：你本人沉落大海。
亞娣：係呀，住大海有龜婿(龜仙)，(泣)……龜婿(龜仙)話我生前……個個都話我「觀世音」……有人求到我「亞滿」！(右手拍了拍心口)我都會幫，人人都話我好！(泣)點解就係會咁短命？(不住擊掌、拍打大腿) 嗚……所以觀世音菩薩見到我(死後)落去地獄，佢都對住我笑，地藏王菩薩都係對住我笑，每一位菩薩，見到我「亞滿」，今時今日咁早死，都戥我好可惜，都係望住我笑，話我本來唔(使)死得咁早……唔會咁早死嘅，嗚……唔好講……我心痛，嗚……係我自己老婆，個把嘴，好黑心，咒人，嗚……報應報喺我身上(不停大力拍打大腿)，所以我咁就死咗！(亞娣雙眼仍緊閉，面紅耳赤，雙手不斷拍掌揮動)所以觀世音菩薩話，「你一世人都咁好人，你不如……你……」(揮手，頭向下晃了一下)差唔多當(我)「菩薩」咁嘅……同我講，「你有四個心(新)抱，其中有一個呢，一定要為人民。」咁啱跣我個仔拍(拖)呢個女仔(食指指指自己，再拍了拍心口)，佢東莞拍(識)嘅，拍到佢……佢呢，佢好神心，神心又好，人心又好嘅佢，佢真係好嘅，所以呢，我推薦我呢個心(新)抱，為！人！民！(說話時右手不停拍打大腿)加上佢自己本身有仙骨！(右手大力拍打左手手肘，再雙手大力拍腿，然後不斷揮動)佢乜都識嘅！佢唔夠膽去「兆事」(話帶鄉音)！點解佢之前為過人，上得天堂落得地獄！乜都唔怕！(雙肩聳了幾下)點解依家猛話，乜都驚！？嘿！(用力晃一下頭)
師父：我有嘢唔明，我可以問你……
亞娣：(打斷 師父說話)佢逃避！(指一下地，點一下頭，狀似明暸。)
師父：你覺得佢逃避？
亞娣：佢真係逃避(右手大力拍腿)！（之前有搵過嗰個英國嘅）六壬師傅都知㗎(突然跪直身子，憤慨地擊掌)，點解連（嗰個）六壬師傅話要幫佢攪乜⋯⋯攪乜呀(雙手不斷揮動)，佢都唔驚，其實（嗰個）六壬師傅知道，我嘅心(新)抱，已經有「大神」附佢身，佢（嗰個師傅）呃我個孫，話「你媽咪邪神嘅」，成日話邪神！如果我(係)邪神， (突然站起來，距壇只一個身位，正面向着 師父，揮動雙手，大聲氣憤地說)咁多位菩薩，正神大佛，在座咁多位菩薩……如果我邪神，會唔會俾我……時會(機會)講咁多嘢呀！吓？
師父：嗱，我想……
亞娣：(打斷 師父說話)我根本上都唔係邪神。
師父：我想問問你先……
亞娣：(打斷 師父說話)妳最好幫我心(新)抱攪番掂，叫佢一定要為人民，唔為人民呢……佢呢……一路一路打落去（以後嘅日子）呢……好多病痛，叫佢個壇整番乾淨，安番個觀音，就算佢係唔拜，都要安番個觀音，齊齊整整，整番好佢，攪番好佢，初一十五一定要佢食齋！(說時一路擊掌)唔食齋唔得！
師父：嗱，你退後一步先，你會舒服啲。( 師父微微伸手，示意亞娣退後一些)你退後一步先，我點樣稱呼你？
亞娣：稱呼我「盧家師爺」囉。
師父：「盧家師爺」呀？
亞娣：係！
師父：(微笑)咪好大囉，「盧家師爺」？個名係咪你自己改？
亞娣：唔係我自己改……我「盧家師爺」呢……都話我心(新)抱以前咯……
師父：嗱，你退後一步會舒服啲。
亞娣：(隨即連續「嘔」氣三次，然後打了一個呵欠，雙手舉向上揮一揮，再垂手大力拍了一下大腿，退後了一步。) 哎呀！(亞娣突然睜開眼睛環顧左右，很疑惑。)
師父：(點點頭，向壇一拜。) 亞娣，過程妳知唔知？頭先個過程妳知唔知？
亞娣：(疑惑的望向四周)……做咩？
整個過程中，亞冰神情很緊張，顯得非常害怕，一度離開法壇，瑟縮站在壇外。
師父：亞冰，頭先聽得清唔清楚？
亞冰沒答話。
師父：聽得清唔清楚？頭先。
亞冰垂下眼睛沒有回答 師父。
師父再三問亞冰，她才緩緩地、小聲地支吾以對：即係佢……
師父重申：頭先佢個過程妳聽得清唔清楚？
亞冰：(問非所答)有啲……啲鄉下……有啲……係啦……(說話時退後一步)
師父：妳驚唔驚呀？
亞冰：(驚魂未定)一啲聽到一啲聽唔到。
師父：(問亞娣)成個過程妳唔知道？
亞娣：(搔搔下巴，眼神疑惑又迷惘又憂慮)呀……
師父：妳洗手先，洗手洗吓面先。
亞娣聽到 師父指示後，急步行出壇外邊洗手洗面。(影音記錄 MOV_0005）
(明天續)
3,740 total views, 1 views today