師父慈悲問亞佩(化名)：有咩想講？
亞佩不忿地說：點解成日都係我？成日都搵我做乜嘢？
師父：碌咗咭，或者用咗一啲錢、資源，你唔還或者唔記得還，唔緊要，冤親債主會搵你；冤親債主搵你係好事。
唔好諗「咁慘嘅，點解我咁慘……」。
其實冤親債主出現，你就有機會還；佢唔出現，你一路好順，要風有風，要錢有錢，你個人就會好容易迷失。所以唔使唔開心。
弟子們，平常心去睇呢件事，好不好？而家亞佩係老師呀，話俾我哋聽，因果出現嘅時候，會發生啲乜嘢事。譬如，我哋法門，正式嚟講，就係斬妖除魔，驅邪治病。但係師父唔強調呢樣，唔強調係咪代表師父唔使做呀？唔係㗎，只不過你哋冇睇過，冇見過。
冤親債主現身，就係一件好事，係佢擺明嚟收數，你咪同佢講數囉！但係你講到牙血出埋都冇用嘅，你要有功德還俾佢先得。依家佢唔係實體呀，佢已經冇咗肉身，你俾咩佢？佢要嘅就係一個心態上、心理上「舒服哂」嘅感覺，佢靈性渴求呢樣嘢。佢好重怨，有可能你真係殺人放火，亦有可能你只係踩親佢腳指尾，呢個係一個執念、執着，佢就係要搵喇，搵到，現前，你就要（修）功德迴向俾佢。你做你嘅功課還俾佢，（但）佢唔放手喎⋯⋯執念重嘛，執念重咪唔放手囉。好喇，你如是者一日，兩日，一個月，十個月，一年，兩年，就算你還唔晒，利息都會還咗，慢慢（冤親債主）佢會睇到自己醜怪，「……呢個人都唔係咁衰啫，冇以前咁衰，冇再殺人放火喇⋯⋯嘩，乜我咁醜怪嘅！哎呀，我仲衰過佢呀……」，於是鬼鬼祟祟離開。
所以呢，冤親債主現前，有逆境，或者身體有事，有病，或者經濟上唔富裕，又或者，擺到明係有情況(右手比一比亞佩方向)，我哋平常心，感恩心，去睇呢件事；埋到嚟，你就有得拆喇。唔使問點解（會發生靈體滋擾自己的事），再問點解呢⋯⋯就問吓，係咪我唔小心呢，係咪我有意或者無意，傷害咗眾生呢？
因果裏面靠你哋自己，珍惜這個緣，去種善因，如果做好多好事，但生一個惡念，就已經抵銷晒（所修功德）。所以呢，冤親債主現前係好事嚟嘅，平常心去看待，繼續努力。
明唔明白呀，亞佩？冤親債主好難先會搵到（你），你睇番自己果個（晴明錄）篇幅，重溫一吓。冇事之後，得閒又要再重溫，（自問）點解自己當時咁樣呢？但我哋有冇得追悔，（不能讓）時光倒流，（想）喺事件發生之前去制止佢，係冇可能，（自種其因）你始終要應（果）。菩薩（修道）都要應咗劫，先成為菩薩；再應，再應，再受，再受，然後先至一路一路咁樣(雙手比劃一級級向上)，然後成佛，再俾眾生有個機緣認識，明唔明呀？
大家記住喇，以後嘅日子靠你哋自己，諸佛菩薩教我咃嘅方法， 祖師爺指引我哋嘅路向，都係要靠你哋聽聽話話（修正自己）。
法水、 祖師爺茶葉，同埋你哋自己嘅功課，非常之重要，你哋要做好你哋自己嘅功課，同埋每件事，每一個人，你哋真係要感恩（對待），大家要好好地去珍惜，明白嘛？
眾弟子：明白。
326A6830 2023.12.30 13:44
延伸閱讀
沙膽標 如果有來生 我唔會再做壞人
219 total views, 2 views today