《晴明錄》原來生命好脆弱

 

 

2021年10月6日 (星期三)凌晨52分

 

「那同事」哭着:

 

多謝 法玄師父!多謝 師公!多謝 菩薩同 二哥!

 

原來生命好脆弱。我從無諗過自己幾時會離開,甚至無諗過幾時退休。因為覺得自己年輕力壯,前途一片光明,好美好。

 

但係,突如其來嘅意外,真係剎那間發生,就似電光一閃。無辦法躲避。多謝 師父俾我呢個機會,多謝屋企人對我嘅愛護。我好唔捨得,但無辦法,呢啲係天意。希望我嘅離開,唔會帶俾屋企人太長時間嘅傷痛。就當我去咗度假,一段時間之後會再返嚟。(玄眼濕)

 

師父,認識您真好,只可惜太遲。如果今生有機會識 師父,同 師父做到朋友,會係我一生最大嘅榮耀。真嘅, 師父。(玄淚)多謝您!但都唔算太遲,起碼而家識得 師父,將來一定有緣再見。

 

師父,好多嘢想同 師父分享(玄淚),但一下間唔知邊度開始講好。師父(玄淚),我一生人都好努力,無偷懶,無諗過會有咁嘅下場,唔係話好唔甘心,只係無諗過,所以要時間去消化,去接受。

 

師父,您好好,好多謝您!

 

師父,我相信命運,更相信努力會有回報,所以我做嘢好認真,但係,過份認真都未必係好事,會得人憎。(玄:唔好咁講。)明白,過份認真都未必係好事,未必人人可以接受。

 

師父(玄淚),啲水好凍,除咗因為水嘅溫度低,仲係因為自己開始無感覺嘅時候,連人體嘅溫度,同人本來應有嘅熱血都無咗,所以覺得個人好冷。

 

感覺唔到個世界存在,或者可以講係因為無咗心跳,離開咗呢個世界,唔再屬於呢個世界,所以感到好「冷」。當時,我已經游翻上岸,好黑,唔見曬啲人,覺得好奇怪,點解沙灘咁靜?但而家講番轉頭,都好奇怪嘅係,我上番岸,唔見到有人嘅時候,我竟然唔記得自己係同屋企人去玩嘅。而且,後來先知道,我上番岸嘅,只係我嘅神識,唔係活生生嘅自己。所以我睇到嘅,係同一個地方嘅另一個空間。

 

當時「我」上咗岸之後,一段時間,覺得好奇怪,無人,自己又唔知點解,唔記得屋企人,「我」一個人坐喺度,戇居居咁。唔知過咗幾耐,好似開始知道番,諗番起,我係同屋企人去玩嘅,記番起我有屋企,又開始覺得奇怪,點解有屋企,又自己一個孤伶伶喺度?

 

百思不得其解,我就開始諗,係咁諗,係咁諗⋯⋯

 

跟住,有個「人」走埋嚟,同我傾偈,問我:「你新嚟㗎?」我唔明,問:「咩新嚟?」

 

個「男人」再問:「啱啱死㗎?」

 

我窒咗一窒。有啲驚驚哋,唔係好明,問佢:「 咩啱啱死啊?」

 

個「男人」話:「哦,仲未知,即係好新鮮。無幾耐嘅事。明白。」跟住佢就起身想走。我叫住佢,問佢,呢度係邊度?因為我唔記得,無印象。講完,佢同我講:「細佬,係咁架啦,遲啲會好啲,慢慢嚟啦!」

 

跟住,我問個「男人」點樣稱呼,佢話「人人叫我做三叔。」

 

我問三叔,可唔可以幫下我。三叔話,急唔嚟,等人搵到我(身體)先。三叔話,照理由,我一無咗,就會有「人」(陰差)執我番去,咁就唔會留喺度。我應該係唔甘心,所以唔接受已死嘅事實。

 

師父,其實唔係唔接受,係發生得太突然,唔明白,所以無照正常流程咁接受。

 

三叔同我講,睇下好唔好彩,屋企人早啲搵番我,幫到我,我就照常規流程咁走。如果唔係就比較麻煩。

 

師父,我好多嘢想講。講下屋企先。多謝屋企人,多謝!多謝!唔好傷心,唔好難過,發生咗嘅事,成為不能改變嘅事實,我都唔想。好對唔住大家,未能好好陪伴,而家仲要大家為我傷心難過,我唔知可以再講咩嚟安慰大家。我希望將來有機會可以報答無條件愛錫我嘅家人。我後悔無珍惜時間,無好好哋同我最愛嘅家人一齊享受美好嘅人生。但其實,我又覺得自己好有福,嚟過呢個世界,有愛我嘅人,有我喜歡嘅工作同人生,嚴格嚟講,應該係無悔。

 

大家放心,因為我想通咗,接受咗現實,加上工作關係,我好盡心工作,查到同破解咗好多問題,上面俾機會我,我會去學嘢,學得好,我就可以有得揀,揀留係嗰度再學嘢,或者即刻再番嚟(投胎做人)。

 

師父,多謝您!多謝您哋嘅法門!感恩 祖師爺!感恩 伏英老師公!感恩 諸佛菩薩!感恩 二哥先師!

 

多謝師父,really appreciate! 

 

May your Root Guru bless you all, all the best and hope that we will meet in the Pure Land. Namo Amita Buddha!

 

It's time(for me) to go!

 

 

「那同事」合十雙手放額頭上

 

 

02:08 畢

 

祈願有緣「那同事」得 祖師爺、諸佛菩薩接引,往生極樂淨土,其家屬親友平安吉祥!

「那同事」微笑合十雙手放額頭上說:感恩 師父!然後後退。

 

感恩 祖師爺!

感恩 伏英老師公!

感恩 諸佛菩薩!

感恩 二哥先師!

南無阿彌陀佛

 

法玄後話:

 

由開始的時候,「那同事」哭,很無奈又無助的感覺。到最後,見到「那同事」心境很平和,很平靜,是受了加持。「那同事」也很有智慧,想通了,放下了,所以「那同事」的神識很平和,很冷靜。

 

佛法,道法,真的不可思議!

 

先天知命六壬仙道壇

澳港傳教司林法玄

2021年10月6日 02:20

 

 

2021年10月7日  晚上6時47分

 

「好多謝 二哥(先師)!

 

呢個世界好美好,睇你點睇啦,希望大家好好享受(人生)!

 

好肯定話俾大家知我哋(一定會)喺淨土再見。我見到 (先釋)法雲師父, (先釋)法雲師父好慈悲,佢好錫 (法玄)師父。

南無阿彌陀佛

再見!」

 

 

2021年10月7日 晚上7時

 

「曇花一現。

 

(我這生)嚟到呢個世界,係因為要遇番有緣嘅人,同佢哋道別。

 

雖然唔係臨離世時真真切切嘅道別,但係,日常嘅相處,短暫分開嘅道別,都係好真心講嘅Bye(再見)!

 

唔講啦!明嘅就明,唔明嘅就唔需要解釋。Bye!」

 

法玄見到「那同事」站姿很直,很莊嚴。微笑合十。

 

 

127 total views, 3 views today

 

Others Post...