《晴明錄》我係好介意人唔錫我,對我唔好

 

2023年5月20日 00:20

 

 

剛合上眼,準備休息。見到一點白光,細細的,很耀眼,很明亮。

 

輕生離世的”他”,光着身體,表情很自信,若無其事,神態自若:「師父,我一啲都無後悔。」

 

瞬間,”他”處身於一個非常黑暗的地方。那廣闊空曠之境,漆黑一片,四野無人。遠遠地,站在大約是自己身高一半的深色欄杆前,似是依着圍欄,實在有一掌之遙,與之保持距離。

 

欄杆,看上去平平無奇,實則是一條警界線,分隔兩個域地之用。

 

圍欄以外,是另一個更為幽深沉寂的虛空界,看不到盡頭,深不見底。這個幽秘深沉的虛空界,有一種難以形容它怎樣讓人感到很不安的感覺。

 

身形高挑的”他”,站姿很直,面向那個幽深之境,若有所思⋯⋯

 

突然,轉個頭來,淚流滿面:「師父,唔係㗎,唔係真㗎!我都以為自己可以好灑脫,原來唔係㗎!

 

我好後悔,點解自己咁衝動。當時,自己係深思熟慮,以為。原來係以為咋。

 

好後悔。點解?點解自己咁睇唔開?錢之嘛,無咗咪搵返囉,無咗咪無咗囉,使死咩。

 

係,我成日做到好似好灑脫咁,其實唔係㗎!我係好介意人(哋)唔錫我,對我唔好。真嘅,啲人(朋友)以為我好叻,邊度係呀,我只不過係唔同人斤斤計較⋯⋯

 

師父,我好凍,覺得自己好凄涼。但後悔都已經太遲。

 

好多謝所有愛錫我、關心我嘅人,多謝晒,無緣再請大家食飯喇!

 

如果真係有輪迴⋯⋯係,係有嘅,原來真係有嘅,只係我哋儍更更(儍乎乎)以為唔會咁快死,又以為死咗可以一了百了。原來唔係咁嘅。

 

(死咗)未醒(魂)嘅時候,仲會以為自己仲喺度(在世),所以仲係(有)未死嘅心態同性格。到醒咗(魂),知道自己斷咗氣,無得掹*嘅時候,我嘅心情係跌到落谷底咁。

 

咁又點呀?死咗囉,無咗心跳,無得玩囉,死直咗囉。咁點呀?可以同咩人講自己受咗咩委屈咩?嘥氣!」

 

突然,”他”又哭起來:「師父,如果唔係榮仔介紹,同我講:『你點解咁儍仔㗎?』我都仲以為自己威返一次,唔使被人睇死。榮仔同我講:『死咗就無可能翻生㗎喇,不過,如果好彩,可以從頭嚟過,投胎做人,都係一個唔錯嘅選擇。』佢仲同我講,佢好好彩,就嚟(即將)搵到主好人家,可以重新(投胎)做人。佢仲話,如果可以,都想幫我嚟見吓 師父,但見唔見到就唔知,要問咗 二哥(先師),睇吓 二哥(先師)幫唔幫我哋申請,申唔申請到都唔知㗎。

 

師父,原來,一生人就咁玩完,真係估唔到。」

 

突然,”他”很急的想走,因為,很多『人』(氣沖沖)追過來要找”他”。

 

”他”急急忙忙:「師父,唔好意思,三唔識七,突然搵 師父幫我,憑咩啊!

 

多謝 師父用休息時間聽我講,俾機會我講。多謝晒,師父!

 

如果可以嘅話,我都好想多啲人幫我誦經念佛超度我。多謝 師父!多謝所有愛錫我,俾過溫暖我,愛過我嘅人同禽獸。

 

『愛是愛,從來沒期待⋯⋯』」

 

很有禮貌的”他”,神情落寞,雙眼養滿濕潤的淚水:「感恩 師父!感恩 二哥(先師)!感恩你哋嘅 祖師!感恩榮仔!」

 

 

合十後退

 

01:12 畢

 

 

 

掹:粵音「擝」。「無得掹」意思是無法挽回。

 

 

 308 total views,  1 views today

 

Others Post...