［黃X光］：「阿妹，我好開心呀！喪禮辦得好好，家人同老死（好朋友）都嚟得七七八八。大家好有心，又送花牌，又做帛金，我好感動，覺得有咁多人錫自己，呢一生真係無白過。（老二都有嚟）
只係可惜，我最終都唔能夠（在世時）上阿妹個壇上香俾你哋 祖師爺！但我好開心，好威水，阿妹你哋法門送嘅花牌發晒金光，隔籬左右都嚟睇，睇下邊個往生者咁威水。哈哈！真係臨尾都（再）威番一次。
阿妹， 法玄師父，好多謝你哋幾姊妹送嘅花牌，好多謝老三，好有心，做兄弟，真係唔想有今生無來世。不過，老二話唔好咁諗，（話）諗嘢要正面啲，積極啲，要一心一意求生淨土，唔好諗來生會點。老二話，如果真係叻仔嘅，就加緊功課，把握機遇。
我（同老二講）話我知（道），我會努力，唔會影衰你哋。
阿妹，無咩想再講啦！主要係想多謝我啲家人，多謝佢哋對我嘅包容！好多謝老二、老三同你哋幾姊妹！多謝啲friend（朋友），今生一別，希望可以好似老二講嘅咁，返到去淨土，大家喺淨土見。唔會係六道再見，起碼我自己真係唔想，見過鬼怕黑，死過翻生（如能去到淨土就係重生）。
我真係最最最要多謝嘅喺你哋 祖師爺，俾老二帶口喻俾我，又特別優待我，話只要我願意，49日之後，就跟老二上去報到。嘩，我當時聽到，幾開心呀！真係形容唔到有幾開心，開心到飛起咁！
阿妹， 師父，保重啊！仲有好多人要你幫，要搵你。你真係好犀利，真係好多謝你，唔講啦！知道好夜，你都好忙、好攰；早啲休息啦，唔好日日都咁夜！
啊，係，仲有，我見到老媽子，真係好靚女，好後生，成個仙女咁嘅樣，真係原來得道嘅人（往生淨土者）可以咁唔同，可以咁靚，咁仙氣。老二都係，唔知點解我會認得佢，其實老二個樣都係唔同晒，好後生，好靚仔，唔識點講，總之就係好唔同，好靚，好⋯⋯好⋯⋯唔識講⋯⋯好好，總之就係好好啦！
老二話我修定之後，得道之後，一樣係會好唔同嘅！
好啦，真係唔講喇！多謝今生遇到嘅所有人，老二教我講嘅，話一定要感恩，要真心感恩！多謝傷害過我，或被我傷害過嘅人，對唔住，請原諒我！
多謝好多好多幫過我，俾過機會我，陪我度過黑暗時期嘅所有人！多謝醫生護士，都係老二教我講嘅！
再次多謝老二，不厭其煩教我、提醒我，多謝！
老二話真係唔好講咁多啦，師父要休息喇！係，知道，多謝！
多謝幾個妹！多謝所有人！多謝！
感恩 祖師爺同所有菩薩！
多謝幫我做法事嘅師父同所有工作人員，包括火葬場嘅職員，辛苦晒，多謝晒！
後會有期！唔係，係淨土再見！
南無阿彌陀佛」
01:04 畢
延伸閱讀
376 total views, 1 views today