2022年7月22日 21:25
［一丁］：「 師父，我係慕名而嚟㗎！係有個 土地公，佢好好人，教我嚟搵您。但係，嚟到，喺壇門口，護法唔俾我入去⋯⋯
我話：『我唔係嚟搵你，我係嚟搵 林師父，搵我 師父。』
護法話我無禮，叫我唔好等，即刻離開。
我聽到就好嬲，即刻想鬧番佢，佢先至係無禮。啱啱想開口，突然好似定格咁，講唔到嘢。即刻諗起 土地公教過我，叫我做人要乖乖哋，要有禮貌，唔好攪攪震。
我就即刻耍冧（敬禮），請 護法原諒：『係我心急咗啲，我無心衝撞你，請你大神有大量。』
護法好慈悲，無再趕我走，但係依然唔俾我入去，無再理我。
師父，感恩 師公特別批准，放我入去。我就跪喺度求，求 祖師爺俾機會我，我會好好珍惜，唔會再令人失望。
師父，我等咗好耐，終於等到。多謝 師父！
師父，係，我唔係人，係禽獸。做人嘅時候，淨係識得偷呃拐騙，無認真做人，無珍惜家人對我嘅關心同支持。 師父，我曾經呃咗一個18歲嘅少女，佢有咗（BB），我叫佢落咗佢，佢唔肯，仲喊苦喊忽，要生要死。我當時只有23歲，搵食都未養到自己，點可能同佢結婚生仔。而且，我，真嘅，真係衰格，衰到無人有。我專登搵個𡃁妹，同個𡃁妹攬身攬勢，等佢（睇到）眼火爆，自動自覺彈開，自己攪掂佢（弄掉胎兒）。
人算不如天算，佢發晒癲，四圍走，叫都叫唔住。我驚佢有事，好嬲都唯有跟住佢。點知佢真係癲咗咁，越叫越走，仲跳欄，點知撠(粵音kick)腳跌喺度。我走埋去，想扶起佢，佢發晒狂揈開我隻手，即刻起身狂跑呀跑，衝咗出馬路⋯⋯
嘭，一聲，好響⋯⋯
係呀， 師父，一屍兩命。
我當時反應唔到。到我有反應嘅時候，我已經做咗個罪人，喺永遠無辦法彌補嘅罪人。
師父，佢死咗，之後，我成日瞓唔到覺。一開始嘅時候，淨係識得驚，完全無諗過其他。有時，仲(又)好㷫（憤怒），好嬲佢，有無攪錯，唔死遠啲，累街坊，累死我。我真係嬲到想打巴佢。
係， 師父，您一早就知，係，我叫一丁，因為我姓丁，仲好鍾意食嗰個牌子嘅即食麵，屋企人就係咁叫我，豬朋狗友都係咁叫我。
師父，件事未完嘅⋯⋯」
22:15畢
468 total views, 2 views today