《晴明錄》 我自少無父無母,風餐露宿

 

剛剛準備外出跑步。沒想到下樓不到一分鐘,隨即感應到有一份「晴明錄」需要接收。當下不敢怠慢,只能一邊走着,一邊緊隨步伐做記錄。善靈將資料源源不絕地輸送而來,直到走到路口時,法玄不得不停下腳步,專心將內容一一記錄下來。

 

 

2026年11月8日  11:43

 

「師父,係,係我, 師父尋日講嗰個就係我。

 

以為有機會 師父幫我開一個File,等我可以⋯⋯(有轉機)點知等咗5分鐘、10分鐘都無機會,就俾 二哥押我走。

 

情況就係 師父尋日講嘅咁,師父講到一清二楚,嗰個衰婆,恃住自己有幾分姿色,拋眉弄眼。我係唔識幾個字,但講打講殺我從未輸過,殺人唔眨眼嗰隻。嗰班兄弟同我出生入死,我都估唔到仲要上埋大佬張床,瞓埋大佬嘅女人⋯⋯(仰天苦笑)哈哈⋯⋯

 

就係 師父咁講一樣,擺明就係剃大佬眼眉,乾乾淨淨。唉!

 

師父,我都係屬於逼上梁山,自少無父無母,無兄無弟,孑然一身。記得嗰年我十四歲,唔係,係十⋯⋯十二、三歲?好似係⋯⋯

 

師父,有頭髮邊個想做癩痢?我無父無母,無親無故,得一樣嘢叻,就係唔怕死。自細就有呢個諗法,死有咩驚呀!合埋雙眼嘅事,驚都未驚過。

 

師父真係慈悲,好多謝 師父肯俾時間聽我呢個冇謂人講嘢,多謝 師父、感恩 師父!二哥教我講嘅!」

 

11:55 (在路邊一直接收資料,知道仍需時,即時想,倒不如在眼前的咖啡廳坐下來。)

 

「師父,講起嚟一匹布咁長!我都算係誤入歧途。其實我自少無父無母,父母親幾時死,點樣死我唔知。我當時幾多歲我都唔知,淨係記得兩堂鼻涕,用手抹極都唔乾淨,隔籬屋嗰個阿嬸就話過我知,你以後自己照顧自己啦,你老竇老母死鬼咗㗎啦,唉,真係可憐⋯⋯唉!

 

師父,而家諗返轉頭,我大概都係得三、四歲,四、五歲,唉!師父,我咁細個,點識殮葬事呀!都唔知係點,好似都係嗰個阿嬸,同埋一啲隔籬鄰舍,求求其其幫我老竇老母搞掂咗,葬咗山邊,一堆泥瓮住*。

 

師父,我一啲都唔記得自己係點樣長大嘅。淨係記得唔知點解冇得食冇得住,咁都唔死得。係命硬?係自生自滅?唔知。

 

後來,有一次,我十零*歲,十二、三歲?太餓啦,幾日冇食過嘢,忍唔住,喺路邊攤檔順手攞咗一個熱辣辣蒸籠蒸緊嘅包,說時遲那時快,俾個檔主一手拍落嚟撳實*我隻手,搶返我得到手嘅包,我即時吞咗一啖口水,想走又走唔甩,佢好大力,我隻手好痛,想踢佢,但有木頭車擋住,我只有原地揼腳,痛得要死。

 

剛剛有個大爺經過,伸隻手㩒住我哋兩個隻手,然後一手撥開佢隻手,好大聲咁講:『幾多錢呀?等我俾。』隨手又攞多一個包俾我,抌低*幾文錢,拍住我膊頭帶我走。一路行一路問我:『細路冇飯開咩,幾多歲啊?你老竇老母呢?』我一個字都冇講,不停咬包,係咁食。

 

師父,我當時就係咁諗,快啲食,食咗就揈開*佢隻手拔腿就走。

 

但呢個大人真係好犀利,佢同我講:『細路你幾耐冇沖過涼啊?件衫咁污糟,我帶你去沖個涼、換過件衫,乾乾淨淨做人啦。』 師父,我唔信,我唔信世上有好人。自從我父母死咗之後,我就俾好多人蝦我打我,我唔信有人會真心關心我。直到呢個大人,帶咗我去茶寮,同我講『有咩食飽先講啦!』

 

我都係唔信,我坐喺凳度唔敢郁,直至幾碟香噴噴嘅小菜放在木枱上,個大人同我講:『食啦,我一個人食唔晒,淨咗都係倒,好浪費;你幫我食啲啦!一陣食飽飯,我仲要去搬嘢,無力我都搬唔郁。』

 

佢即刻開動,係咁夾,係咁夾,一口又一口,無再叫我食,又冇同我講嘢。我靜靜咁坐喺度,佢繼續食,食到一半,佢自言自語話:『唉,嘥*晒嘥晒,咁好味嘅嘢食一陣就要倒晒,真係嘥。有飯冇人食,有人冇飯食。』

 

佢跟住再講:『唉,睇吓一陣有冇人幫我送呢啲飯餸俾邊個食都好過倒啦!』我舐吓條脷*吞咗啖口水,望住個大人,佢真係好叻,睇穿咗我,問我:『你想食咩?咁好啦,你食啦,好過嘥咗佢。』我隻手即時好似上咗摩打咁,筷子好似識飛咁,好快俾我食晒,個大人仲前前後後叫咗三大碗白飯俾我,我連汁都撈埋,從未試過食得咁飽。

 

師父,講到呢度,或者有人會以為佢係披着羊皮嘅狼。唔係,呢個大人真係一個好人,做大生意嘅好人。

 

後來。食咗飯之後,個大人同我講:『細路,風餐露宿日子唔好過,你可唔可以同我講,你父母係咩人,你家裏有咩人?』我當時唔信佢係好人,我冇答佢。佢見我咁口密都冇逼我。再問我:『你住邊?』隻手黏住我件污糟到起晒膠嘅衫,然後又問我:『我都係咁啱經過。平時我唔會行呢段路。我知道你唔答我有你嘅原因,我唔會逼你。但我覺得你可以憑自己嘅能力,搵到一半(食),就唔使喺街度好似個乞兒仔咁,又唔使偷人嘢食。好啦,你唔講就算啦,我都要繼續上路,時候唔早。』

 

大人起身之後,鄰桌兩個人即時起身,護住大人準備離開。原來個大人有人跟住身邊嘅。

 

師父對唔住,咁攰都要收訊息。其實尋晚,半夜我都喺 師父身邊,好想搶閘同 師父講嘢,但係 二哥撳住*我,同我講 師父真係好攰*,有咩聽日*,有機會先至同 師父講啦。我問 二哥我可唔可以唔返去住,可唔可以喺 師父身邊,陪住 師父。

 

啊,師父,唔好咁辛苦,多啲休息,我知道 師父慈悲,好想幫到多啲人,其實我哋呢啲人真係唔抵幫。當然到最後我哋都好想 師父大發慈悲俾個機會我哋,只要 師父肯聽我哋三言兩語,我哋就有機會跟住 二哥走,多謝 師父!感恩 師父。

 

師父,我真係仲有好多好多說話同來龍去脈,點解我做咗山寨王?點解我會發生咁多事?到最後就係 師父尋日講嘅我係死於亂刀之下,身中多刀慘死。多謝 師父,感恩 師父!

 

師父休息下先。我唔可以咁自私,但求自己好,不惜一切。但願,真係可以再同 師父講,一五一十講清楚。

 

多謝 師父!感恩 師父!
善靈十分有禮合十後退。

 

12:48 畢
註:大人乃山寨王之前一生的爸爸,最後被可信的人騙家財及家眷。

 

 

事緣

 

談及此個案,師父解說:「滋擾事主的靈體,前生和事主是有淵源的。事主前生是山寨夫人,而滋擾她的靈體前生是山寨『亞頭』。這位『山寨夫人』沒有正名,而山寨王也有很多女伴,這令『山寨夫人』感到深深不忿,就特意勾搭山寨王的手下們。其實山寨王對『山寨夫人』亦談不上愛和珍惜;『山寨夫人』樣貌和身型也不錯,但私心和貪念卻很重,喜嫉妒,山寨王的手下最初都不敢越軌,怕亞頭知道,命也不保,但『山寨夫人』會氹*他們,像廚房偷食一樣,一次兩次三次,就會變得順其自然。和『山寨夫人』有『特殊關係』的『手下』起碼有六、七個,經常『聯繫』的有三至四個,對此山寨王是完全不知情,因為他也並非將精神、時間全部給予夫人,而且他還有很多其他女伴。

 

山寨王死得好慘,全身被砍好多刀,他死了之後,完全忘記生前的人和事,過了很久,前生記憶就拼湊回來,有一次他偶遇到事主(前生『山寨夫人』),於是『他』晚上會去『攪』她,進行夫妻的那種『攪』、『摸』,但當『他』摸到她時,前生發生的事和記憶全部『番嚟*』,即是『他』死後『看』到那些片段,那些『山寨夫人』與自己的手下們發生性行為的片段,善靈非常怨恨『山寨夫人』即女事主,所以便摵她,成日*摵,全身都會摵,對事主做成肉眼可見的傷痕。」
師父續說:「呢啲個案好難拆解,因為太重怨恨,雙方都有對唔住對方,必須要事主深信(前世今生的因果),「做功課*」,誠心懺悔⋯⋯

 

呢個咁惡嘅山寨王而家就跪喺度拜請 師父,感恩 師父!因為講穿咗,事實係好多呢啲怨案嘅⋯⋯」

 

 

詞解
瓮住:蓋住、封住。
撳實:牢牢按住。
抌低:丟低、放下。
揈開:甩開、擺脫、揮開。
嘥:浪費。
脷:舌頭。
撳住:按住。
攰:疲倦。
聽日:明天。
氹:哄、逗。
番嚟:恢復。
成日:經常。
做功課:誦經、鈔經、持咒、念佛。

 

 

 

 73 total views,  22 views today

 

Others Post...