2023.11攝於江西定南
2023年11月23日 02:23
［娟娟］很開心笑着：「 師父，係呀，係我呀！ 師父您好！好多人叫我做娟娟，我好鍾意！
師父，我好開心，終於見到您，可以同您傾偈。凍咗噃，您使唔使着返件衫（外套）先？
唔好意思呀，要 師父咁夜起身同我傾偈！
師父呀⋯⋯
您好靚！真係傳說中咁，好靚女！對唔住，我唔應該咁樣講，唔應該咁樣形容 師父，應該話係莊嚴，我唔識講， 二哥教我講。對唔住！
師父，唔係嘅！我唔係唔甘心，只不過真係有啲說話想同 師父講。想透過 師父金口，話俾有緣人聽：『原來一生真係好快就過咗去，無得返轉頭，無得由頭開始。真嘅，無論係有冇遺憾，都要接受現實。』
師父、（識娟娟嘅）有緣人，我而家好好，有食有住，大富大貴。係喇，就係咁喇，我無去到主嗰度，我喺天道，過天人嘅生活。都唔錯喇，都幾好㗎喇。都算心甘情願囉！
師父，你 二哥好靚仔⋯⋯對唔住，我又係唔識講，應該話好脫俗，好莊嚴。 師父，原來得道嘅人真係好唔同樣㗎！好奇怪（唔識點形容），好特別，好唔同！
師父，我好鍾意呢度， 師父個館呢度。好靜，好舒服，好莊嚴。係，係你哋 祖師個壇好舒服，好莊嚴！感恩 師父！多謝 師父！
師父，真係講您都唔信，係亞鍾⋯⋯ 師父你都早知道喇！係，係佢話我知，想我同 師父講聲，多謝 師父，感恩 師父！
係， 師父，係咁嘅，真係唔講大家都唔知嘅！我哋（離世嘅）有個演藝人協會，係上面特准設立嘅！所有演藝界台前幕後嘅從業員都可以參加。當然，係喇，有啲就得道嘅，去咗淨土嗰啲，好少出席，天人、地獄、甚至（少數特選）餓鬼，都可以參加（出席）。
大約係人間一個月左右，會有一次大會。出席嘅，胸前會有個牌，唔同界別就唔同顏色。例如，天道嘅橙黃色；地獄嘅，黑紅色；餓鬼嘅，冇色；開會嘅時候，因為界別唔同，氣場好唔同，大家睇到大家，但唔會走到唔同嘅界別度傾偈。點樣傾偈呢？我哋係會用心靈感應，譬如話亞鍾，佢同天人嘅亞甲溝通，但天人亞甲心裏面，即係意念裡面冇亞鍾，咁亞鍾就唔會同天人甲溝通到。
亞鍾好多謝 師父，好想我幫佢搵 師父，代佢多謝 師父！佢話，如果有來生，如果可以見到 師父，佢好想親自拜會 師父，多謝 師父救命之恩！佢話，佢唔想（死），但係自己唔爭氣，賭輸咗，好大鑊，唔死都冇用。但死咗之後仲大鑊，散晒，真係無彎轉。佢話好多謝亞張，係亞張叫佢搵 師父，話 師父好慈悲，一定會幫佢。但（亞張）佢講明，佢話亞鍾係一定埋唔到 師父身，就係連想吓（ 師父法號）都唔得，因為（亞鍾）罪孽深重。但亞張真係好好，佢同亞鍾講：『有志者事竟成，一定會有機會嘅。』講完，亞張都（好大損耗）即刻冧晒。（像是穿着整齊衣服的人，肉身瞬間消失了，整套衣服突然掉在地上一樣。）
師父，係呀，我哋聚會嘅時候，全部都係有返做人嗰時個樣（同身型），就好似在生嗰時一樣。但，當然啦，呢個係幻象。目的係俾大家認得出大家。得咗道嘅，包括天人，都講吓自己在生時做過啲咩，點解會得道。上面（諸佛菩薩）嘅目的，係等地獄同餓鬼眾生心生羨慕，心生歡喜，等佢哋有機會學道，元神聚合就可以投胎做人。希望嗰啲眾生帶住好嘅記憶，做人就要好好珍惜，好好做人，唔好再做衰嘢。
係啦， 師父，千個，萬個，萬萬個（餓鬼）之中，會經過呢個機會，仲帶到一啲啲（要洗心革面）記憶，會重新做人。
師父，唔講啦，阻 師父休息，唔好意思！但係， 師父呀，我真係好開心，可以咁近距離同 師父傾偈，真係覺得好舒服！好多謝 師父！
呀，仲有，亞菲姐話好多謝 師父，但佢未夠分，未走得（未可輪迴），但佢話自己舒服咗好多，多謝 師父！仲有，佢話想 師父保佑佢個女健健康康、開開心心！
師父，仲有，有一個（唔出名），師父唔識佢嘅，佢話都係多謝 師父！佢想早啲投胎，問 師父可唔可以幫吓佢。佢話，佢自己都唔係幾記得自己叫咩名，唔知係亞明定亞文。（即時見到亞明/亞文左邊面近鼻翼二厘米左右，有一粒好大粒嘅癦，知道佢生前係做幕後嘅，係剪接。亞明/亞文即時豎起兩隻大拇指。）
師父，真係唔講喇，我再講就越嚟越多『人』嚟搵 師父啦！
師父，講完，我成個鬆晒，幫咗『人』開咗聲求 師父幫佢哋，我真係舒服晒。多謝 師父！
後會有期，再見！」
娟娟笑着揮手道別。
03:21
236 total views, 1 views today