2023年5月9日 12:40
“他”十分開心，笑得燦爛而純真。
「係啊， 師父，係我啊！
師父，我真係好閞心，收到好多有心人嘅祝福同迴向。真係好多謝佢哋，好感恩 師父！感恩有 您！
師父啊！我仲有好多嘢想同 師父分享，想講吓我點樣識亞M姐，點樣同佢成為好朋友；又想同 師父講，我（在世）呢一生人最後悔做過嘅事。 又想⋯⋯
諗諗下，都係唔好再講喇！
師父啊！您想唔想知我點樣識您，啊點樣知道有你嘅存在呢？（ 開心微笑 ）
係，講起嚟有段古（故事）。 有一次，我遊吓遊吓，遊到去尖沙咀梳士巴利道⋯⋯
當然啦，係夜晚。
師父同一大班人（弟子），喺附近行過。 我哋成班『人』，好似要睇怪獸（奇怪嘢）咁，嘻嘻（對唔住），唔係，係睇下有咩好嘢睇咁。我橫掂四圍遊（魂），好得閒，戇居居，咪跟住班『人』去睇吓咩事囉。
啊，原來有個咁得意（好唔同）嘅人。
跟下跟下（ 師父入咗去個商業中心），我哋成班就喺嗰度樓下（外面）等。到 師父出嚟嘅時候，係喇，就係咁喇，我哋俾人（護法）趕，走埋一邊。
師父行路有風，弗弗聲，好快上咗車。
我哋成班（遊魂）友仔即刻四散。我就唔係，我想跟住 師父（坐嗰）架車。 當然啦，（好快知道）冇得跟啦。 咁我就跟咗 您其中一個徒弟，唔係，係兩個（一對）徒弟，去咗觀塘⋯，返咗佢哋屋企（大廈）。去到樓下，已經見到紅紅嘅光，知道樓上有菩薩（神壇）在位， 唔敢跟上去。
以為跟住佢哋，始終就會有機會見返 師父，搵 師父幫我。點知原來，佢哋好日都唔會見 師父，（無機會見 師父）我都好失望。
隔咗好耐，幾耐， 唔知，唔記得。
終於，有一次，我又見返 師父。唔係跟住之前嗰兩個（徒弟）而見到嘅。 係有一次，我去尖沙咀彌敦道，近佐敦附近，我去見吓個（在生嘅）friend。 行行吓，見到啲光，好熟悉嘅，就係喺上次尖沙咀嗰度見過嘅。我即刻知道咩事，好開心，跟住個光源去搵。俾我搵到，一間素食館，喺地鐵站附近。
我好想入去， 唔講都知啦，入唔到去，咁我咪喺門口等囉。終於等到 師父出嚟，身邊仲係有其他人。我企到好遠，條頸都伸到長晒，好想行近啲，但係好得意，係唔得嘅，有一種力量，係令到我哋郁唔到，唔可以再行前一步嘅，好奇怪。
咁離遠見下都好嘅。又係咁囉， 師父離開咗間齋鋪，我哋想跟近啲都唔得。但我今次唔會放棄，最多離遠啲，盡量跟到幾多就幾多囉。
（勝利笑容）嘩！今次（當時）， 唔係我自己讚自己，我好叻仔，跟到去嗰個工業區。 師父啊，真係對唔住，又係阻住 師父，知道 師父趕時間出去，想講多啲，（ 師父）咁趕，覺得唔係幾好意思。但係， 師父，其實嚟見你一次都真係好唔容易㗎，好想 師父幫到我哋⋯⋯咁又點呢？都未講到開頭，（無時間俾我講咁多）又要講到尾喇，重點我都未講， 師父就已經趕住要出去。
或者我講幾句啦，睇吓下次有冇機會真係幫佢開口，問 師父幫吓佢。 師父啊，係咁嘅，我有個friend，係我走咗（離世）之後先識（呢個死咗阿叔）佢嘅。喺街嗰度識佢，係個阿叔，我諗大約50零（幾）歲，56至58歲，我冇問佢，只係睇上去係咁嘅年紀。
師父呀，長話短說，佢好慘㗎，冇咗隻腳，佢又好似我咁，揀咗一個好蠢嘅方法，去完成咗（自己人生）。
我知道有 師父呢個人之後，我有同呢個阿叔講過，有提起個 師父嚟。我同呢個叔講，如果有機會我同佢一齊去搵 師父。但係呢個阿叔，佢真係好有自知之明，可能佢做人嘅時候見識多多。
佢有講過：『冇用㗎，佢幫唔到我㗎。』
師父呀，（我）唔係聽到好多有關（阿叔）佢嘅嘢，係聽過一啲。我知道佢好有義氣，好肯幫人，最後搞到自己一身蟻，仲冇埋條命。佢有個女好細個，佢走（離世）嗰時。佢唔放心個女⋯⋯
佢好想跟住屋企人，原來唔係咁易嘅，唔係話想跟就得嘅。
師父呀，知你咁忙，真係好唔好意思！不如算啦， 師父成日講嘅（道理，隨緣），我諗我哋真係要學吓。
師父，早幾日 賀誕，我哋成班『人』都喺度。係 祖師爺慈悲，畫咗個範圍，俾我哋（眾善靈）企喺度參與。好開心呀 老師公！
二哥（先師）催我，叫我重點講就講，唔講就走啦， 師父趕時間。
師父啊， 咁我講多幾句。好多謝所有愛錫我，幫過我嘅人，特別係最近，誦經迴向俾我嘅人。誠心多謝大家，有緣再見！
千言萬語，盡化感恩！」
13:29 畢
⋯⋯⋯⋯⋯⋯
14:06
「 師父啊！ 二哥話，我哋錫（敬重） 師父，就唔好令 師父咁操勞。感恩 師父同 二哥（先師）！ 感恩 祖師爺同 伏英老師公、感恩 佛菩薩！多謝大家、有緣人！」
201 total views, 2 views today