2023年4月30日 12:20
「師父，早晨！師父，我係秀雲。
師父，係呀，係我。我尋晚見過 師父， 師父都見到我。
係呀，就係喺塔石廣場個活動。
師父，我見到 師父行入嚟嗰時，弗弗聲，好似一陣風咁，所以我哋成班（靈體）都（離遠）見到 師父。
師父呀，我哋好開心呀，當時。但係，冇人夠膽走到 師父身邊，喺我一個咁大膽，膽粗粗，走埋去搵 師父。 師父就好似睇唔到我咁，掂行掂過。我明嘅，咁多（靈體）料邊度做得晒呀。而且，實在”我哋班人”真係唔抵爭嘅。自己攞嚟衰，好地地，都唔識得珍惜咁寶貴嘅生命。
師父呀，我呢，係台山人，好早嚟咗澳門，（當時）大約十七歲。恃住自己有幾分姿色，貪威識食，冇嚟正經。如果未死，而家應該係86、87歲。係呀好老㗎啦。
唔好意思，阻住 師父㖭。但我唔理咁多喇，對唔住， 師父！
我等得太耐喇，想改變，唔想響條街度”溜離浪盪”（遊魂），想 師父你幫吓我。
師父呀，係咁嘅，後生嚟咗澳門之後，為咗唔俾（鄉下）人睇小，我就好心急搵錢，成日諗住發達。邊有咁易（發達）呀，發夢就有我份。我遇人不淑，以為搵咗個好碼頭，點知原來唔係水魚，係魚目混珠。
多謝 師父俾機會我，多謝 二哥俾我嚟，表哥都好好（跟住 二哥），同埋我嚟。感恩 祖師爺！感恩 伏英老師公同菩薩！ 二哥教我講嘅，多謝 二哥菩薩！感恩 二哥菩薩！
師父，講番（件事）先。我識咗嗰個叫亞威嘅人，佢其實都（衰到好似）唔係人嚟嘅。佢話自己識好多有錢佬，可以介紹俾我識，但係我就要識做，俾返啲好處佢。
我咁貪心，梗係應承住佢先啦。錢就使咗唔少喇，仲俾埋自己（失身俾）佢。
佢真係介紹咗啲人俾我（喺夜總會）識，話就話係有錢人，其實多數都係黑社會頭目。知又點呀，（我自己）有錢就開眼，唔係，係俾啲錢遮住對眼，乜都睇唔到。懵吓懵吓，就咁就跟咗個黑社會第二把交椅嘅亞K。亞K對我好好，但佢有老婆，個死肥婆仲係好衰嗰隻，但我當佢死嘅。（亞K）不但止（有老婆），佢仲有好多契家婆。對唔住， 師父，我講嘢（慣咗）好粗俗，對唔住！
但講真嗰句，有咁多女人鍾意，唔係大把錢，就係有權有勢，一唔係就靚仔。 師父呀，（上述嘅）佢樣樣都有齊，仲唔止，佢好識氹人，真係好識氹人，把口好叻，床技都好叻。對唔住，整污糟 師父對金耳，對唔住， 師父！
二哥叫我正正經經講嘢，如果唔係就啲我走。對唔住， 二哥菩薩！對唔住 祖師爺！對唔住 伏英老師公同 菩薩！
師父，係，長話短說，我跟咗亞K，仲做埋佢第幾房。亞K對我真係好好，佢仲教我氹肥婆、佢老婆。第二樣我就唔識啫，氹人，我把口都有返咁上下。
但肥婆真係好難氹，惡死”能登”(很惡)。（初初）我真係好憎佢，但為咗保住自己，我真係好努力咁去討好佢，陪佢打牌。陪吓陪吓，氹吓氹吓，我多咗時間同肥婆，唔係，喺亞姐一齊。慢慢發覺阿姐原來個人好好，心地好好，佢咁惡都係俾個老公（亞K）逼出嚟嘅。之後，亞姐（慢慢）開始接受我，對我好好；之後，就真係當咗我姊妹咁，我真係開心晒。
但原來，好日子真係唔長久嘅。無幾耐，亞K又溝咗，唔係，係識咗個𡃁妹，仲收埋咗個𡃁妹，氣到我同亞姐爆炸。
亞姐搵到嗰個竇口，帶埋我同幾個姊妹，一齊衝上個竇口度，揼咗（𡃁妹）佢一餐。 亞姐仲同個𡃁妹講，見一次打一次，再見第二次就毁佢容 ，嚇到個𡃁妹（軟晒，抱拳）跪喺地求饒。
師父呀，唔該晒，辛苦晒， 師父！
亞K梗係差唔多第一時間知道咗啦，帶埋幾個近身兄弟衝上嚟，掉咗一疊銀紙喺地下，同個𡃁妹講：『你有咁遠走咁遠，唔好喺度搞搞震。』然後搭住亞姐膊頭，成班人（一齊）離開。
師父，真係（我嘅際遇）一匹布咁長，好想同 師父講晒，但知道唔可以阻 師父咁耐。
師父，呢單嘢過咗冇幾耐，亞K又識咗一條女叫亞琴。條女，唔係，係個女人都幾正嘅，身材好好，玲瓏浮突，個樣雖然邪邪哋，但睇真都係幾”索”，幾靚嘅。
亞琴好鍾意講粗口（亞K唔喺度嗰陣），真係魚蝦蟹乜嘢海鮮都出齊。我哋幾個姊妹都好X憎佢。
師父呀，唔講咁詳細喇！ 師父呀，我終於跟亞K好耐，兩、三年，三、四年左右，我同佢手下發生咗感情，係算日久生情？我唔知。因為亞K越來越少時間陪我，又怕我悶，佢就搵個手下陪我（名義上保護）。個手下唔係幾講嘢，大大隻隻（好後生），除咗出街，同我保持好大段距離，目光都唔會留喺我身上。點知有一日，真係好似電視劇咁⋯⋯我好唔開心飲咗啲酒醉醉地，喺地下喊苦喊忽，（手下）佢就唔知點算好，同我講：『亞嫂，亞大（K） 應酬忙，亞大話叫你早啲瞓，一有時間就會嚟睇你。』你估我傻嘅咩，都好耐冇見人，只係俾錢我使，我都知咩事喇。玩厭咗喇嘛，（另有新歡）見都懶得見（我）。
師父，都係唔阻 師父咁耐，我講最後。
最後，因為同個手下有感情，但手下對老大好尊重，我哋兩個都止乎禮。係因為咁樣，我仲覺得辛苦。
間中見到亞K，佢都仲係對我好好，但（我）感覺唔同晒，覺得無靈魂咁，覺得無晒以前兩個人相愛嘅感覺，覺得親密嘅動作都好表面，真係（只係）一個熟練嘅動作。
漸漸，我心灰意冷。覺得無可能離開（到亞K）佢，又得唔到佢嘅愛，等我成個人都變咗酒肉行屍咁。
有一日，（我）見完亞琴，受咗啲氣，受咗委屈，返到空無一人嘅所謂屋企，心灰意冷，飲酒解悶。
飲下飲下，坐咗喺床頭地下，喊下笑下，撥下曾經亞K好鍾意（撥弄）嘅頭髮，話又滑又香。而家（當時），我披頭散髮，淚流滿面，好想瞓，但長期瞓唔着嘅人，飲咗酒都瞓唔到，我就（伸手上床頭櫃）順手攞起咗樽安眠藥，食咗兩粒三粒，又再喺地下坐下、喊下、撥下頭髮，完全無想瞓（着）嘅感覺。
唔知自己坐喺地下幾耐，都一段時間，想上床瞓。（上咗床）又瞓唔到，隔咗好耐，唔知幾耐，又食咗兩三粒安眠藥，又一段時間，又再食，又再食，唔知食咗幾次，唔知食咗幾粒，23歲，就玩完喇！
師父，如果我好似 師父咁，咁珍惜時間，咁我一定唔會咁，一定唔會就咁無咗（條命）。如果有來生，如果可以投胎做人，如果可以見返 師父，我好想跟 師父學道，（哭着說）真係好想！
感恩 師父！
南無阿彌陀佛！
感恩 祖師爺！
感恩 伏英老師公！
感恩 佛菩薩！
感恩 二哥菩薩！
多謝我曾經遇到過嘅所有好人，多謝亞姐、亞K、手下！
多謝表哥同亞德！
南無阿彌陀佛！」
合十拜退，跟着二哥離場。
14:10 畢
345 total views, 1 views today