攝於江西定南
2023年4月10日 20:57
先亞Dee：「哎，原來要去淨土係唔容易㗎！我仲未得，未夠分。唔該你話俾我啲家姐同妹聽啦（可以念經迴向俾我往生淨土）！我好多謝佢哋咁錫我，呢一生同佢哋做姊妹真係好，真係好開心；走埋一齊扮下靚，一齊食，一齊講東講西，講下笑，真係好好。
（笑着）嘩！乜你原來平時真係咁忙㗎！（先亞Dee再笑着，鬆鬆肩。）
哎……唔係，係 師父。你好叻啊，我識到你，我覺得自己好威！
尋晚，你過嚟坐，我已經好開心，大家咁耐無見，係老咗啲，但其實無咩變，依然係咁靚女。
你走咗（離開殯儀館禮堂）之後，有其他堂嘅主家人（離世者）過嚟，問我點解會識你。我話我哋識咗幾十年，雖然呢十幾（廿）年無見，但 師父都掛住我，專登嚟送我一程。我好開心，好多謝 師父！
師父，你要保重，唔好咁操勞。
我聽到家姐講表姐嘅事，我推佢，想叫佢唔好講，不過家姐感覺唔到。咩人咩事，都過去，無緣，講咩都無用，（講）都無意思。
好多謝你講我嘅事時留筆。係嘅，過去咗嘅，唔開心嘅，都唔好諗。
係呀，你同我多謝亞然啦，佢真係好有心，多謝佢！仲有，想你幫我同佢（榮）講，一切都已經過去喇，我真係已經原諒咗佢，叫佢唔好放喺心。同埋，多謝X寶同X珠，（嚟殯儀館坐）有心喇！多謝你哋咁錫我個仔！榮，個仔係乖，係生性，但你自己都要保重，照顧好自己。如果有來生，我哋可以做朋友，好朋友，咩都傾得嘅好朋友。
無喇，無咩特別想講喇。係，多謝你二哥，佢有嚟睇我，同埋表哥（亞銳）嚟，我好開心。雖然我唔識得二哥，但係第一次見都覺得好親切。亞銳同我講，佢成日同二哥一齊，跟二哥學嘢，跟二哥去做嘢（幫人、救人）。我問亞銳，做咩嘢啊？佢話好難解釋俾我聽，總之就係做好事啦！
我好好奇，問亞銳，咁我可唔可以同佢一樣，都係跟住二哥？我咩都肯做㗎，幫到人，我都好開心㗎！
亞銳話唔係想跟就可以跟，係 祖師爺安排、批准先得。
咁我就無再問亞銳。我問你二哥，我可唔可以同亞銳一齊跟住佢。二哥話隨緣，一切自有安排。二哥仲話：『妳功德未夠，呢段時間（49日）好關鍵，乖乖做好功課，加埋家人親友功德迴向，睇上面（ 祖師爺、諸佛菩薩）點安排啦！好喇，我哋（二哥同亞銳）要走喇，好多嘢做。』二哥臨走再同我講：『你乖乖哋，俾啲心機啊，機會係存在嘅！』
二哥同亞銳”fit”（拂）一聲就唔見咗，有陣濛濛嘅煙，真係好似做戲咁。
師父啊，知道你好忙，唔阻你啦！希望我好似二哥咁講，揸緊呢49日，做足功課，有機會跟住二哥學嘢同幫人，又可以間中見到 師父。
仲有，多謝 師父讚我，講得我咁好，又話我（出殯）個妝化得好靚，係呀，我都覺得係（好靚），我好鍾意。
好喇，我走喇，新仔（離世日子短）唔嚟得咁耐。多謝 師父！感恩 師父！
感恩 祖師爺！
感恩 諸佛菩薩！
感恩 二哥同亞銳！
感恩我嘅兄弟姊妹、家人、親友！
感恩 師父！
祝大家身體健康、平平安安！
有緣（他生或淨土）再見！
南無阿彌陀佛」
21:43 畢
264 total views, 1 views today