2018江西萍鄉圓通寺
2021年10月12日 （星期二）下午5點10分
師父中午好！係，我係[阿嬌]，多謝 師父！
師父，好耐無見，上次 師父嚟過，轉眼一段日子。
師父，我而家好好，多謝 師父掛心！上次見面之後，我哋幾個，聽 師父講，乖乖喺（寺）門口排隊，排咗幾耐唔記得，都好耐下。
大隊（人喺廟）出嚟，之前，已經有護法趕我哋，走埋一邊，唔准擋路。期間一直有幾位護法守住，擋住，手上搦住長捧。我哋好乖好聽話，全部閃埋一邊，唔敢郁。大家唔敢八卦，微微低頭。除咗因為要守規矩，仲係因為全部人、佛友喺度念佛，我哋好怕嗰啲光，雖然唔刺眼，但都係好怕，所以我哋都係微微低頭。
師父，多謝 師父關心，我哋好好，而家，我哋差不多全部都等緊輪迴。只係當時，嗰個[阿叔]，無跟大隊（我哋）走。因為阿叔唔捨得個孫，話個孫太細，無人睇住唔得。我哋有勸佢，同佢講「兒孫自有兒孫福，唔好咁執着。機會錯過咗就無⋯⋯有都可能要等好耐好耐⋯⋯」但當時時間好緊迫，無時間考慮咁多，亦無時間再勸。護法挏（撞擊）咗法杵，我哋即刻明晒，全部蹆（退）後企好，排開一字。
好快，天上降下幾位（大神），手上法捧一揮，我哋成班，除咗唔肯走嘅阿叔，我哋就被押解到另一個空間，諗都諗唔到嘅。
一去到，好黑，睇唔到有幾大，睇唔到有咩嘢。又係唔知等咗幾耐，期間，各自一角，好自然唔會傾偈，唔會有咩溝通。
等咗好耐，唔知幾耐。有位 菩薩，唔係，係 仙家，都唔係，唔知點樣形容或稱呼。嗰位，哎……老師啦！嗰位老師嚟咗，同我哋講：「大家日思夜想嘅機會嚟喇。而家仲有時間同機會，大家可以再一次做選擇。可以返去之前嗰度，自由自在生活，無人管，無人理。另一個選擇係跟住落嚟嘅安排，接受咗，就無退後嘅餘地。」
然後，老師豎起三隻手指，示意三二一。
一切好似靜止咗。大家都無反應。意思係，我哋全部郁都無郁，原地不動。
好快，三秒，有幾位 仙家到咗，塵拂一揮，大家各自跟住 仙家，秒間一齊消失。
其他（靈友）係點我唔知。我就跟咗一位 仙家，去到一個豬欄。豬欄好簡陋，有兩隻大豬，幾隻中小豬。 仙家塵拂一揮，我見到自己係豬欄出世，做咗隻BB豬，又見到自己之後俾人劏咗，燒（烤）埋，上埋枱，大家（賓客） 興高采烈，舉酒共飲。（被）碎屍萬段嘅我，（變咗）隻燒乳豬，係反轉，因為死咗。但企埋一邊嘅，做咗豬靈體嘅我，一邊流淚一邊哭訴無門，好淒涼。 仙家好好，再塵拂一揮，俾我睇多兩生。
做豬之後，我又做人，做妓女，俾人呃晒啲錢，（係）一個好愛我，我又好愛嘅男人。佢其實係騙財騙色嘅衰人，表面好似好錫我，但只係想借（利用）我搵錢，借（利用）我呃人錢。仲引我吸毒，控制我，等我聽晒佢話，郁都無得郁。
師父，對唔住，阻 師父時間，好對唔住！
師父， 仙家再俾我睇多一生，我係教書嘅，但係婚姻唔美滿，家嘈屋閉，求生不得，求死不能。返到學校就玩自閉，唔同其他老師有任何溝通，上堂就敷衍了事，對學生就不聞不問。因為自己係孤兒，自少得唔到愛，以為（同）愛自己，自己又好愛嘅人，一齊建立家庭，就會有幸福。點知一切都係假象，原來，愛無保鮮期。好快，我哋兩公婆就日嘈夜嘈。好快，就人前相愛，其實各懷鬼胎。
師父，感恩 仙家俾我睇咗我將會喺輪迴之後會有咩際遇。我一邊睇，由最初無動於衷，跟住睇到哭不成聲，係咁喊，撳唔住。
然後， 仙家塵拂一揮。帶咗我去地獄，俾我睇咗平民區嘅生活。然後話我知嗰度係地獄最好條件嘅地方。我見到嘅係黑黑哋，無生氣，同以前生活（人間）地方好唔同。我當時好似定咗格咁，無想法。
仙家跟住帶我去另一個地方（地獄*），嗰度有光，覺得好舒服。雖然地方細細，但係好靚，感覺呼吸都唔同咗，「人」都輕身咗，輕鬆咗。 仙家俾我喺嗰度行下望下，我好似睇展覽咁。（*善靈所說的是地獄新設之展示廳。那裏金黃光亮，乃極樂世界莊嚴淨土的變現，真實之縮影。）
好快，轉咗去另一個場景，好似迷你影院咁，兩邊牆有棗紅色絨布包棉芯裝修嘅牆身。有大約一百個座位，椅好舒適。
到咗呢個場景，好快，見到有人坐喺觀眾席上。但人唔多，大約二、三十人。好快，有一位衣著光鮮亮麗嘅老師，企喺台上，即時又加咗光。感覺好嚴肅，同埋覺得好似有好重要嘅事宣布。
真係，台上男老師，好特別，衣著非常時尚整齊，雖然無咩笑容，但感覺好有力量，又好親切，好有信服力嗰種。
老師開始出現時，企喺台上右邊一旁。之後，企埋去台中間，加亮咗燈光；老師企定，望住台下面嘅大家。定一定。
（法玄）師父真係好忙，唉⋯⋯我哋真係好慚愧，咩都做唔好，連做人都做唔好，死咗都要人幫，有時唔識諗，嫌三嫌四。要受（果報）都抵（應該）。
話說，老師企定咗，我哋就即刻全部都唔敢郁。兩邊通道有幾位護法守住，前後中，分別企喺度守住。企得好直好直，一丁點動作都無。
（台上）老師定一定，然後，老師後面嘅螢幕，開啟。
首先，播放極樂世界淨土，好光亮，好莊嚴，唔識得點形容。好似短片咁，播放莊嚴淨土。
師父，對唔住，咁忙……都繼續幫我哋。如果我哋唔爭氣，唔做好自己，真係豬狗不如。 師父，放心，我哋會努力，唔會辜負 師父嘅心意。因為我哋冇資格，真係冇資格再犯錯。
師父，講返台上（螢幕）播放嘅影像。播極樂淨土，片係偏金黃色，但係唔刺眼。有一種超越皇宮好多好多倍，有一種遙不可及嘅感覺。播放咗幾耐唔記得喇。
之後，播放人世間嘅景象。感覺好熟悉，因為人來人往嘅街道，雖然唔係自己生活過嘅地方，但見到啲人，好忙，行來行去，係50年代嘅香港。
跟住，好快，播地獄唔同嘅刑罰處所。
台上老師一直無講話。直至所有片播放完，一共播咗幾耐，唔知道，好似好耐，又好似好快。
我明白咗，意思係，有天堂/極樂世界，有人間，有地獄。等我哋知道一啲我哋做人嘅時候唔知，或者（曾經）聽到都（無留心等於）聽唔到，或者（明明聽到）當聽唔到嘅嘢。我哋一次過睇晒，唔好再話唔知，點解無人俾我哋知，好唔公平。
明白，接唔接受係自己，接受到去到邊都係自己（得益）。
多謝 師父！感恩 師父！感恩 諸佛菩薩同老師！
感恩 慈悲嘅祖師爺！
感恩 伏英老師公！
感恩 諸佛菩薩！
感恩 所有師尊同老師！
感恩 二哥先師！
師父辛苦晒！
希望將來喺淨土見！
多謝多謝辛苦晒！
南無阿彌陀佛
善靈微笑合十
19:30畢
1,121 total views, 1 views today