2026年5月31日 01:03
「師父，等咗 師父好耐，唔好意思，阻 師父休息！
唔好意思，師父！係啦，就係咁啦！今日 師父睇到咁啦！
（前生）我同佢冇仇冇怨，（30多歲女事主前生）呢個婆仔咁狠心，監生*推我落井。我嗰時得十四歲咋，過兩個月就係我生日。佢無原無故，氹我埋去個井度，一下用力推我落去。個頭撞到個井口出晒血，對眼痛到睜唔開，手腳都損晒，流晒血。
（靈體哭訴着）
未算呀⋯⋯師父！
我係好痛好痛，但我唔係即刻死咗，我都無暈到，係又驚，又好痛好痛，冇辦法上返去，周身痛，連叫救命都冇氣力。過咗幾日，唔知係失血過多，定係餓死、嚇死⋯⋯都唔知囉！
（靈體大哭）
師父，係，我係好怨佢，臨死嗰時我一路記住佢個衰樣，我一定要報仇，要親手挖佢雙眼，剝皮拆骨，仲要佢求生不得，求死不能，先可以消我啖氣。
係， 師父您真係好犀利，係，就係咁，我跟咗佢幾世，三世，好似係。化咗灰都認得佢。佢（最近嘅）前一生係個男人，我唔投胎都要跟住佢，佢俾我整斷咗隻腳。啲人以為係因果，（以為）呢個賣豬肉嘅豬肉佬呃秤所以因果報應，係啦， 師父見到咁，我喺佢行緊條橋嗰時，撠*佢隻腳，想撠死佢。點知呢個死人豬肉佬咁大命，唔死得，淨係跛咗隻腳。我條氣好唔順，但係都好心涼。個死跛腳佬斷咗隻腳，仲斷埋子孫根，佢老婆無咗「人生樂趣」，揾咗嗰啲做木佬做埋啲唔見得人嘅嘢，我睇到心都涼晒，抵死。
師父，對唔住，我唔係有心對 師父無禮，講埋晒啲咁肉酸嘅嘢俾 師父聽，對唔住！
師父，我都知道自己唔啱，但怨恨心重，不惜一切。當然，冤有頭債有主，但同時都係冤冤相報。終於，鬼王追緝，我（再）被打入地獄，受火刑。後來，報（應受）滿出獄，可以投胎轉世。排隊揾亞媽入胎時，我離遠認得佢（在前面排隊投胎），我想衝埋去打佢。但唔知點解，好似做戲咁，我出盡力向佢方向衝過去，對腳好似上咗摩打咁，超級快，真係超級超級快，但係原地跑，無辦法跑向佢嗰度。
師父，辛苦晒，唔好意思，阻您休息！我真係真心覺得唔好意思。
係，我有呢個念頭（衝過去想打死佢，捉住佢），鬼差即刻捉咗我去見判官，重新落快勞，我又坐監。有冤無路訴，我發毒誓，一定要佢填命⋯⋯
唔好意思， 師父，知您貴人事忙，好眼瞓，對唔住！我仲有好多嘢想同 師父講⋯⋯明明仲係一肚氣，好多嘢想話俾 師父知，突然唔記得晒自己想講咩。哈哈，咁奇怪嘅！ 師父，您⋯⋯
算啦！我知 師父唔想我多事，『冤冤相報何時了』，我明嘅。 二哥同 德哥嚟咗，仲有 阿彩姐都嚟咗，（二哥）叫我唔好阻 師父休息！要（跟住二哥）走就走，唔走就返去（地獄）坐監。（靈體突然記起前世一啲仇恨，大叫）無天理啊！」
靈體積累多生仇恨，很多怨氣。 二哥不想靈體再添怨恨心，隨即扚起*靈體，帶靈體離開。
靈體被扚起，雙腳離地，吊吓吊吓，被二哥扚走。先亞德和先法力跟在先二哥後面，急步跟隨。
走了幾步，先二哥和大眾瞬間消失。
01:50
監生：廣東話；解「活生生地」、「強行」或「硬生生」，常用於形容某種殘酷、不合理或不顧別人意願的行為。
撠：廣東話，粵音：gik1；主要有抓住、握持或卡住、阻礙的意思。
快勞：源自英文 file 的廣東話音譯詞，指文件夾或檔案夾。
扚起：廣東話（音同「的」）；意思是提起、拉起或抽起。
12 total views, 3 views today