2026.05.11 法玄師父攝
今日跑步，突然想跑一條新路綫，經過南灣湖，轉向西灣方向跑，沿着民國大馬路，過了半邊橙，途中一看，向前繼續跑去觀光塔，比回頭跑向旅遊塔，近一半路程，而且未曾跑過這路段，決定一試。
剛跑入西灣湖另一端，正準備向旅遊塔方向前進。大約五十來歲男善靈，看上去乾乾淨淨、整整齊齊，在天橋底樹蔭下，微笑揮手迎向法玄，很有禮貌。
停下來，後退幾步，拍了一張環境照，慢步繼續前行，一邊行，一邊收錄個案。
2026年5月11日 17:35
「終於等到 師父跑到嚟呢度啦！
多謝 師父，感恩 師父！
師父，食多啲嘢、休息多啲！
師父您真係好犀利，咁忙都可以兼顧咁多嘢。好彩今日 師父終於跑到嚟呢一邊。
聽就聽得多，伸到頸都長晒，終於等到，見到 師父，好開心。
師父，其實好多年前已經見過 師父，20幾年，30幾年（前），唔記得。
當時 師父見一個茅山師父，鼓勵個師父要誦經、念佛、食齋，但係當時個師父望落去（見 師父您）好年輕，個茅山師父心裏面唔服 師父，唔信 師父，所以聽嘅時候都只係聽；當然，之後乜都冇做到（好多年後佢先後悔）。
師父，您係好慈悲，好想人好，幫咗好多人，但係有啲人真係唔抵幫。『有人就人，冇人就陳大文』。
師父⋯⋯
但係，我真係好想 師父您幫我。唔知點解，我一啲都放唔低，死咗幾十年，到而家都放唔低。唔知自己放唔低啲乜嘢，就係成日喺度流離浪蕩，等朝唔得晚。
如果有得揀，我真係唔想做個無主孤魂。 師父，其實我呢一生人，意思即係話，我未死之前嗰一生，我都過得好慘。自少冇父冇母，係，我係個孤兒，點樣長大都唔記得，都係經歷咗好多艱苦嘅時候，以前嘅日子冇錢真係好難捱，俾人睇唔起。
17:43 （途中見到一張塗了白色的水英泥凳，善靈很有禮貌招呼。）
師父，坐吓先啦！（唔坐啦，多謝！）
唔好客氣，我多謝 師父就真。師父跑緊都肯聽我呢個無謂人講嘢，應該話係⋯⋯無謂鬼靈精，哈哈。
有時我都會自娛，自己氹自己開心，如果唔係啲時間真係好難過。
講返我未死嗰時。嗰一生（生前），係，我係好窮，搵朝唔得晚，連老婆都養唔起，老婆跟佬走。之後我就借酒消愁，以淚洗面，一蹶不振。讀書唔成搵錢只有一個方法，唔係偷呃拐騙就係做苦力。當然，偷呃拐騙都要有膽量先得。
我係個冇膽鬼，我唔敢呃人，我驚俾人打，所以苦命人都唯有腳踏實地，埋頭苦幹。話我呢一生人好慘咩，我又遇到一個好工頭，佢好似係姓陳，係台山人，佢對夥計好好，對我格外照顧，知道我冇人冇物，有工開都盡量俾我開，我係真心好感恩佢。
有一晚，因為公司唔夠人用，要搵一班人開夜。我其實啱啱當完日更，搬搬抬抬，個人已經冇晒氣力，但係工頭開到聲，我真係會沕水舂墙*，幫佢開通宵。其實當年都唔興開通宵，但係因為真係趕貨，迫於無奈，我同幾個夥計，一班人硬撐，就係因為我一時唔小心，跣腳，三樓跌落地，跌斷咗隻腳，當時想忍住，但係忍無可忍，好彩班工友好好，即時同我報警，送我入醫院。
醫咗好耐，隻右腳斷咗，鋸埋，從此得返一隻腳做人，我更加頹廢，真係一蹶不振。
工頭同工友都好好，初初成日嚟探我、安慰我。之後因為搵食艱難，大家都少咗嚟見我。出院之後，我就喺個幾十呎嘅房自我埋怨，終於逼出一個病。大概三五年，我終於玩完。
我冇怨人，因為知道命苦，只怨自己。
師父，有咩方法可以放低過去，俾自己一條生路？
17:55 （一邊收資料做記錄，行到觀光塔餐廳買麵包。）
二哥嚟咗，叫我唔好咗住 師父。 二哥好好，之前見過佢，佢好耐心教我念佛。
但 師父啊，你都知啦，我哋死咗嘅人，要念佛係好難好難㗎，真係唔容易㗎。
我好開心，好感恩有機會同 師父傾偈，感恩 二哥俾機會我，感恩 師父俾咁寶貴時間我⋯⋯
哦⋯⋯啱啱 二哥俾我知道，原來前生，我係嗰個衰婆嘅大佬，亞哥，曾經出賣佢，所以佢好怨恨。終於（今生）做咗我老婆，初初深愛對方，最後佢跟人走，仲帶埋屋企僅有嘅少少積蓄。原來係咁，原來真係有報應。
師父，我知道啦，明白咗啦，我都唔應該再怨人，（ 二哥教我）應該要感恩！我會乖，會好好哋做人，唔會辜負你哋 祖師、菩薩俾嘅機會，多謝 二哥，多謝 師父！
師父我走啦，跟 二哥返去。我會重新學做人，多謝 師父俾機會。 師父，如果有機會，我想再見 師父，親自多謝師父。如果有機會，我真係好想好想當面感恩 師父，感恩 師父，後會有期！
南無阿彌陀佛」
18:05
沕水舂墙：廣府話。
沕：粵音味。古意為深藏的樣子; 沕水就是潛入水底的意思。
舂：古書裏「舂」跟「沖」相通，表撞擊、衝撞之意。粵語口頭語中喜歡用“舂”來形容目的不明確地亂跑亂走，「盲舂舂」就是說人瞎走。
沕水舂牆，也有寫為沕水撞牆，其字面意思是潛到水底還要撞上牆，實際意思是形容為了某個目的或某個人而上刀山入火海也在所不惜。這種不考慮一切後果的赴湯蹈火行徑就是沕水舂牆。
資料來源：新浪新聞_手機新浪網
師父寄語
改變命運 立志修行
生活在世，必然有很多經歷；發生不如意事，時而有之。
用甚麼態度來面對逆境，是改變命運的重要突破口。面對困難，偶然失去信心，能及時覺醒，鼓起勇氣，積極向上，總會遇到扭轉命運的機會。
反之，執着、埋怨、反叛、報仇、消極、放棄⋯⋯不但於事無補，反而會令自己行差踏錯，甚至一錯再錯。
這個個案的無主孤魂，自少無父無母，沒有學識，在地盤工作，因為體力透支出意外，右腳被截肢，加上妻子的背叛等負面心理因素，以致情緒問題導致患病離世。簡單而客觀來看，就是一個苦命人。
先二哥的透露，善靈才得以知道妻子離棄自己，是因果報應。二人前生是親兄妹，哥哥為利益出賣妹妹，把親妹誘騙，讓不務正業的二世祖「玩弄」，妹妹不甘被污辱，帶着怨氣，含恨投河了結生命。
這無主孤魂生前婚姻由起初的相親相愛，後來妻子跟人私奔，令自己感到十分傷心難受，原來是前生妹妹決意向哥哥討債，投生成為其妻子進行報復，讓他感受被背叛生不如死。
從這因果實錄來看，一再引證，在我們身邊出現的人，極大可能是前生的有緣人，或善，或惡。
因果如影隨形，六道並非兒戲，跳不出輪迴，果報難了，循環不息。只有遇到正法，把握機會，立志修行，才能真正自救，改變命運，脫離六道浮沉的苦海。
89 total views, 58 views today