2025.12.03怡保
2026年3月27日 23:26
「多謝姑姐！多謝老豆！我今生好幸福，能夠成為你哋一家人，覺得好開心，好好彩。
講起上嚟，我唔應該得到咁多人愛錫。自己（前生）做得唔好，衰人一個，好壞，帶毒品，教人吸毒，偷錢，無人性，完全係一個衰人。
我喺九龍城寨出世，龍蛇混集，烏煙瘴氣。講粗口仲叻過叫人早晨，應該話係多過叫人早晨。
無偈，自細冇父母，真係粵語長片咁。我亞媽係舞女，老豆都係吸毒吸到上晒腦，我未足月佢就去咗賣咸鴨蛋。老媽子就（諗住）繼續做舞女湊大我，點知響我三歲嗰陣，俾個有錢佬，有老婆嘅肥佬睇中，老媽子就跟咗肥佬，抌低*我，俾個跛腳婆鄰居（照顧）。每個月係咁意*俾多少（錢）佢，跛腳婆有個女，個姐姐大我十幾歲，好錫我，當我親細佬咁照顧我、教我。點知我唔爭氣，未大先壞，好細個就學人偷嘢、搶嘢，仲成日同人打交，出晒名。
講返轉頭，（老豆死後，）我亞媽俾錢跛腳婆，後來我叫佢做契媽，俾咗兩三個月，之後越俾越少，好多時唔見咗人。到我三歲，啱啱識行識走，老母就俾個肥佬拋棄。事緣係肥佬個老婆知道咗，摷到上屋企，佐敦道，兩個女人打起上嚟，肥佬兩邊都唔幫，走咗去。正室跟住一邊喊，一邊追出去。我老母就喺所謂佢哋嘅（金屋藏嬌）屋企，係咁喊，係咁掟嘢。肥佬兩個星期唔見人，我老母就好似無咗佢會死咁，四圍去搵佢。肥佬有心避開佢，話都無咁易。原來我老母已經有咗，但肥佬唔知。終於搵到肥佬，話佢知（有咗），但肥佬老婆外家好有勢力，大把錢，迫肥佬揀。講真，使咩揀呀！肥佬焗住俾多少錢我老母，叫佢落咗佢，以後唔好再搵佢。
呢啲都係我十六歲，好似識性，其實一啲都唔識性，唔爭氣嘅時候，契媽講我知嘅。其實，老母俾人拋棄之後，日哭夜哭，飲酒度日，得到肝癌，好快玩完。臨死前話俾我契媽聽，叫契媽同我講（佢）係病死。（唔想我知咁多）
點解契媽會講清楚我知，係我十六、七歲成日同人打交，學埋吸毒，又偷嘢，又搶嘢。
契媽同我講，我本質唔壞，只係好嘅唔識，識咗壞人，就成日同班衰人稱兄道弟，『好事做盡』，契媽唔忍心我沉淪，講清楚俾我聽，叫我爭氣做人，懸崖勒馬。
可惜，好說話就係聽唔入耳，講極唔聽，終於入咗冊（坐監）。
判咗三年，差唔多期滿出嚟，契媽就走先一步。最後一面我都見唔到。做咗老師嘅契姐（我出獄後）同我講，叫我乖乖哋，重新做人，唔好睇小自己，唔好怕被人睇小，爭氣做人，一定會有好日子。
對唔住，師父，越講越遠！
最後，想講，多謝老豆同佢嘅家人！我好幸福，有個家真係好好，有家人錫真係好好！來日方長，有機會嘅話，我真係想做老豆親生仔，我會好好孝養老豆，唔會要老豆捱苦。老豆保重！
多謝二伯（ 二哥先師）帶我嚟見 姑姐師父！
多謝 姑姐師父！
多謝、感恩 祖師爺同師公、菩薩！
多謝 姑丈師伯同所有愛錫我嘅人！
多謝！」
12:07 畢
事緣
“狗狗亞Q”（QQ），是法玄三哥家中養的狗。狗齡十三、四歲，早兩日，26號早上約10:45離世。
三哥今晚和法玄通電話時，告訴法玄，29號星期日，他家會為”亞Q”辦最後一件事。法玄告知可以誦經念佛或鈔《心經》迴向給”亞Q”。也可以送寵物/動物陀羅尼被（往生被）給”亞Q”。往生被主要可透過專門的寵物善終公司或佛教用品店購買。
迴向”亞Q”往生淨土，或速轉人身，有緣學道學佛，勇猛精進，當生成就不退菩提。
抌低：粵語詞彙；指丟下、拋棄。
係咁意：廣東話俗語；指隨便、大概、象徵式。
10 total views, 10 views today