2026.01.24 玄真閣・還神
2026年1月25日 12:17
唔好意思，師父，又係我，我又喺您食嘢嘅時候打擾您！因為 師父最得閒嘅時候，唔係瞓覺就係食嘢，我只有呢段時間先可以攝位，我同 師父講兩句。
係，師父您好犀利，我，就係 師父嘅亞哥。幾多世之前，唔記得喇！呀，先講返，我有嚟，尋日，係 二哥俾我排第一，（帶）同大家入嚟。因為我見過 師父，同 師父講過嘢！
師父，點算呢？又係 師父食嘢時間，啱啱先整返熱啲麵，又放底咗，我唔好意思。
點解呢？既然（有一生）係您亞哥，點解又會咁客氣呢？
好簡單，師父就係 師父，我哋唔敢無禮，更何況唔係普通 師父，係大眾（玄很受感動又眼濕濕）心目中好尊重，值得尊敬嘅 師父。而且，一生還一生，唔可以魚目混珠，亂哂籠。
師父，簡單講，唔（想）阻 師父咁多時間，真係連食都被「人」攪住晒，對唔住，我知道 師父慈悲，唔會介意，仲係好樂意幫我哋。但係，有啲九唔搭八嘅人（低智靈）懶叻咁，扮晒「好人」咁，話我哋唔識做人。係呀，我哋唔識做人，淨係識得做鬼，仲係好想做隻厲鬼㖭，唔得咩？扮x晒嘢。唔好意思，一時忍唔住，講咗粗口整污糟 亞妹師父金耳！
亞妹師父，我再簡單講，講返重點先。同亞妹嗰一生，亞妹讀書好叻，紥住（兩）條孖辮仔，好得人鍾意，最得父母偏心。雖然我係好唔爭氣，但亞妹無對我唔好，仲成日痴住我呢個大你十幾年嘅亞哥，要我抱你遊花園。
原來，屋企有錢未必一定係好事，特別係有唔爭氣，唔識珍惜嘅仔，真係好容易三朝兩日就敗清光，話都無咁易。
家道中落之後，我仲未知衰，終日遊手好閒，成日跟埋啲損友去攪攪震，仲野咗一身病。因為無錢醫，就搵個地方，無人住嘅爛屋，喺柴房等死。
等死係一件好痛苦嘅事，死唔斷氣，死唔眼閉，都係講唔出嘅千年苦一樣。
亞妹師父，多謝你（嗰生）後來聽人講，估計我呢埋喺邊度。得16、17歲嘅你，學都唔返，咁鍾意讀書嘅人，竟然不惜一切，由日至夜，由街頭搵到街尾，由好屋搵到爛屋，死心不惜，終於搵到我。
我當時喺爛鬼（破爛屋）柴房仲未死得，就係死緊頭，及時俾你搵到我。
見到走晒樣嘅我，成身爛皮膚嘅我，亞妹你竟然攪住我係咁喊，話要即刻帶我返屋企，你同陪你搵我嘅兩個男同學仔講，叫佢哋幫手扶我，要同我返屋企。
亞妹師父啊！（嗰時）我邊度有面見父母啊！你不斷喊住求我，我好弱嘅身體，差啲俾你搖散。講笑姐。唔係，當時真係爭啲散咁濟。但我好記得，當時感覺好溫馨，覺得唔知點解，本來（心裏覺得）天昏地暗，突然變得一天光晒咁。好多謝你！
當時我無講出口，但我心裏面諗，如果我有機會好返，我一定要好好照顧你，報答你。真嘅。
但好可惜，雖然（你）搵咗好醫生幫我，但嗰個時候，呢啲花病係無得醫㗎！
亞妹師父，再一次多謝您幫咗我，俾我有機會見到您，覺得好幸福。
當日係 二哥帶我嚟見 師父，可惜太遲知道（道和因果）。
師父，不如你先休息一下，有機會，真係假如有機會，再同 師父傾偈。
我，唔緊要㗎。返正而家我好得閒，而且，真係想要改變命運都無機會啦！
亞妹師父，您要保重，請您保重。希望，真係好希望，將來有機會見亞妹嘅時候，我係有肉身，我真係好想再做您哥哥，好想好想，好好保護亞妹，愛錫亞妹，彌補返嗰一生自己做唔到嘅遺憾，同時真心講句好棍報答您。
感恩 二哥師父！
感恩我 亞妹師父！
（二哥‘先師’提醒：）
感恩您地 祖師爺同菩薩！
感恩 護菩薩者！
感恩 二哥師父！
感恩 表哥師兄
感恩 邱長老！
感恩 黃道兄！
感恩、多謝我（前生）個好妹妹 亞妹師父！
感恩呢個妹夫 然哥！
感恩尋日見到嘅每一位！
多謝 亞妹師父騰空地方俾我哋呢班無主孤魂一齊還神，向 祖師爺謝恩！向 菩薩同 二哥，同 佛，同向所有人謝恩！
多謝，多謝！
感恩！感恩！
13:11
14 total views, 14 views today