2025.06.15 玄真閣
2025年6月15日 17:16
男善靈，47歲，身形細細粒粒，很瘦。
「師父，係，兩點幾 師父見到嗰個係我。
個衰女，好嘅唔學，衰嘢做到加零一。唔係，我唔係衰女今生個老豆，係前生再前生，好似再前生㖭。
個衰女，嗰生，係衰到無人有，應承咗幫我還債，之後一走了之。
（連累）我俾人監生打死，叫天不應，叫地不聞。
師父，我死得好慘，好冤枉。我係，係曾經好爛賭，輸晒屋企啲錢。但無呀，我改咗喇（哭）！
師父，後來，我都係面對現實，捱生捱死，養活一家人。個衰女喺酒樓，茶寮做工，識咗個有錢仔，假嘅有錢仔。個衰女信晒佢，信佢係等錢周轉，做生意啲錢未返嚟，有批新貨要攞，個衰女話得，我返去同屋企人商量。點知，個衰女返屋企就話舖頭有個亞叔，年紀大，家鄉有老人家出咗事，要一大筆錢，等救命。個衰女同我講，叫我有錢就攞晒出嚟，（冇就）去問人借。我話邊使咁樣幫人㗎！佢話你點知咁多呀，個亞叔好淒涼㗎，佢幫過我好多，佢對人好好！係咁誽*我，喊苦喊忽*，要生要死。
無眼睇佢。
師父，唔好意思，阻你。個衰女，逼我賣間屋幫佢。佢仲話，將來佢大富大貴，都係益咗我，會照顧我一生一世。
師父，唔好意思，好多謝 師父幫我，俾機會我入嚟（館），俾機會我講我哋嘅事。
師父，我仲有好多嘢想講，但知道 師父趕時間外出，唔好意思再講落去。前生嘅事，（而家突然）我好想就此一筆勾銷，多謝師父俾機會我哋！
師父，我跟 二哥走喇，多謝 師父！感謝 師父！感謝兩位師兄（師姐）！多謝師伯然哥好好人！
二哥教我講：
感恩 祖師爺！
感恩 伏英老師公！
感恩 諸佛菩薩！
感恩 老師公老師父！
感恩 二哥菩薩！
感恩 師父大慈大悲救（個衰女）佢！
多謝！多謝！」
這位有緣善靈「陳叔」，跟二哥從玄真閣正門離開。
17:44 畢
誽：粵語語詞，即懇求他人。
喊苦喊忽：指哭個不停，哭哭啼啼，叫苦連天。
事緣
2025.06.15 16:30 玄真閣
Candy到館上香叩頭謝恩。
Candy ：「5月22日晚，我如常11點幾準備瞓覺，瞓之前亦好似平時咁，喺 觀音菩薩神位前做15分鐘功課，之後再同 觀音菩薩講「我而家瞓喇」，一瞓落床就覺得暈暈哋，其實之前幾日都feel到暈暈哋，我都無理，點知一瞓就昏迷咗！
嗰晚我老公咁啱半夜12點幾，無啦啦*起身攞個hand free（耳筒）义電，見到我黐埋埲*牆度，老公話我平時都唔係咁瞓，仲要個人全身唔郁，對眼睜大，佢覺得好唔妥，就叫醒個仔，報警叫十字車*，入QE*（急症室），老公話我期間雙手係咁不停咁郁，但我自己就完全唔知⋯⋯到了大約2點半，我睜大眼，見到咁多光，就問老公，今日星期幾？點解你企喺度？老公話：「妳昏迷咗！」護士話：「（呢度）醫院嚟㗎！」我仲以為發緊夢，老公話醫生同我抽咗血，驗到我血糖低到0.8（血糖如果0.6就拜拜*），醫護同我打咗葡萄糖針，打入我嘅大動脈，但係我自己就咩都唔知！
之後，醫護同我照心臟、照心電圖，照完話我無事，不過要我留院觀察，但我話我要返工呀！於是5點幾，就簽紙出院了。
隔咗一個禮拜*，醫生通知我話我鉀低，要食鉀藥丸，之前無食過鉀藥，只係喺18年因為鉀偏低飲過鉀水。再隔一個禮拜又收到信通知，話嗰次入急症室照到肺有5cm白點，要安排再照。
食咗鉀丸後精神好咗，而家每日打胰島素針，我都自行打少咗分量，同埋食少咗嘢，因為覺得以前食少咗照打高劑量胰島素針就會暈。以前都有試過低血糖成日會暈，但未試過暈低，昏迷嗰晚係比平時少吃了。回想起，我都好感恩我老公救番我。
而家瞓覺都會有啲驚，瞓之前，求 觀音菩薩加持。
我每晚瞓覺前做嘅15分鐘功課：唸《六字大明咒》108遍、《懺悔文》3遍、《南無觀世音菩薩》聖號108遍、《南無本師釋迦牟尼佛》聖號108遍、《南無地藏王菩薩》聖號108遍、《南無藥師佛》聖號108遍。」
師父問Candy上館感覺如何，Candy說：「知道可以上館之後，覺得好開心，無話唔想上館。到館之後覺得好舒服，無不安嘅感覺。」Candy續說：「低血糖情況差過高血糖，會死人，高血糖（依她個人而言）淨係口乾，無咩感覺。」
當日Candy上館之前2個多小時，師父已「見」到有「人」站在館門前。該「人士」身材略瘦，是與Candy有關的人士。
註：Candy於2000年認識 師父，事緣她懷疑自己撞邪，經同事介紹下找 師父幫忙，師父當時透過電話施法，解決事件，之後她再到澳門總壇拜見 師父，師父慈悲再施法替她封身。
2014年，Candy再次找 師父，事緣她與丈夫關係轉差，加上確診遺傳性糖尿病，令她十分沮喪，經 師父開示及鼓勵之後，Candy打消離婚念頭，重新出發，後來更與丈夫和好，自此她每年都參與恭賀 祖師爺誕晚宴。
無啦啦：港式俚語，即無緣無故。
埲：粵語牆的量詞，等如「堵」。
十字車：港式俚語，即救護車。
QE：伊利沙伯醫院
拜拜：港式俚語，意思指離世。
禮拜：港式俚語，即星期。
延伸閱數
有緣善信向 師父求醫
181 total views, 2 views today