2024年1月21日12:41
先麥法力往生後第三天
12:36 先法力跪地向師父拜謝。
12:39 先法力：「我仲有啲嘢想同 師父講啊！」
12:41
先法力：「 師父！我感恩跟到您，原來真係唔容易！
以前都知道 師父忙，成日都係為咗人。而家，（我）走咗，無咗肉身，可以四圍去，可以睇清楚好多嘢！
感恩 祖師爺俾 二哥（先師）嚟接我（往生），我掹住衫尾勉勉強強上到去。 二哥叫我唔好諗咁多嘢，叫我專心念佛，話諗得多，好散亂，無好處。好感恩 二哥！真嘅，死咗啦，往生咗，知多好多嘢！
首先，知道自己真係做得唔好，對 師父無禮！感恩 師父從來冇怪過我，仲成日想我乖乖地由頭做起，好好修。
記得 師父講過：『做唔好，學唔好，返唔到上去。』我聽嗰時，好驚，因為心裏面怨恨過 師父，成日話我呢樣嗰樣，成日淨係話我，又唔見 師父話第二個。原來，自己一直以嚟都做唔好，但只係以為自己係做得最好、最真心嗰個。 二哥俾我睇返以前衝撞 師父，對 師父無禮嘅片。當然，都有對師兄弟無禮嗰啲，都有睇到。我真係想搵窿瓹*。
師父，凍咗，着多件衫，唔好冷親。我啲仔女，麻煩 師父幫我睇住吓，辛苦 師父，唔該 師父，感恩 師父！
感恩 師伯一直護持 師父，好用心，好真心，好難得！有時見到我哋唔爭氣， 師伯心裏面好難過，但又唔話得我哋，因為見 師父都唔出聲，獨自承受。所以 師伯有時都忟忟哋。 師父，您好幸福，應該嘅！ 大大師兄真係好好，係真係好好，我好想親自多謝佢，好孝順，好乖！可惜，我無機會（親自面對面講）喇！
師父，請您老人家保重，唔好咁操勞，小心身體！（我都唔想咁早接 師父！）
師父，我仲有好多嘢想講，但 二哥話俾 師父唞吓。麵包烘熱又凍返晒！
師父，我哋真係好好彩，跟到個咁無私嘅 師父！希望今次我真係可以順利過關，可以留喺上面（ 祖師爺度）！我會努力加油， 師父唔好操心，我真係會努力，唔敢辜負 師父期望，多謝 師父！感恩 師父！感恩 師伯， 法然師伯！感恩法門為我誦經念佛嘅師叔伯、師兄弟！來生再見，唔係，係 祖師爺度再見！淨土再見！
南無阿彌陀佛」
先法力合十向 師父拜請，跟着 二哥回去。
13:05
搵窿瓹：瓹音捐，意指鑽進洞裏。
269 total views, 2 views today