2023 攝於四川閬中 祖師爺廟外
2023.8.15 星期二 13:15
「多謝 師父！感恩 師父！」
善靈倀雞英哭着，合十跪在地上，淚流滿面⋯⋯
「師父⋯⋯
師父⋯⋯」
倀雞英滿面淚水，哭不能止！
「師父！我好後悔，自己爛賭又囂張，惹人討厭不自知。
到我（臨）死嘅時候，兩眼瞪大望住佢，自己標晒尿，想同佢講：『你要咩就囉啦，我俾晒你，我唔會篤爆你！我唔想死，真係唔想死呀！』
佢真係心狠手辣，睇住佢對眼，真係好似變咗第二個人咁，對眼紅色，好恐怖！佢後面企住個人⋯⋯又好似唔係人咁樣。但嗰時，我乜都唔識驚，淨係好驚會死。
我好細個嗰時，見過人死，好恐怖，兩腳一伸，兩眼一瞪，條脷伸埋出嚟，好恐怖！從此之後，我好怕一個人，特別係夜晚。好驚！
呀！首先，我要多謝⋯⋯係，係 感恩你哋 祖師爺！二哥菩薩教我講嘅！感恩 二哥菩薩！感恩 法玄師父⋯⋯（大聲哭叫出來！）
師父，如果早啲識您，又或如果（死咗之後）早啲可以跟住萍姨，搵到 師父，我就唔使咁慘喇，師父！」
倀雞英淚流滿面，再繼續說：「師父，因為死嗰時好驚，又好唔甘心，要死都唔放過佢，一心要跟住佢，整返死佢，一命填一命。
原來，講就容易，諗吓就得，要做，係好難好難！
我一死，（差不多）斷氣嘅時候，有好多游魂野鬼嚟趁熱鬧。個個（圍住）拍爛手掌，好高興。一個個喺度笑，又跳舞，又轉來轉去，好開心，好似開Party 咁。但好奇怪，以前嘅我（未死之前），我肯定嬲爆。但嗰時，唔識嬲。唔係，都係好嬲，嬲⋯⋯我唔識佢哋，無啦啦走入嚟我間屋度做乜？當然，係因為我戇居，唔知道自己死咗，又唔知道呢班人，唔係，唔係人嘅『人』，原來可以自出自入。
到我冇咗氣，但（當時）唔知自己死咗，淨係覺得好攰，唔知點解自己咁攰，好似擔完泥咁。嗰時，完全唔記得晒同人搏鬥過，自己已經死咗，冇咗條命。
到我回咗度氣，回一回神，覺得好似發咗個夢，一個恐怖嘅夢。但又覺得（唔係夢）好真實咁，諗吓又記得啲，諗吓又好似唔記得。
隔咗一段時間，我終於記返起，自己已經死咗，係俾人監生整死。到我完全記返晒嘅時候，我開始搵佢。但搵極都搵唔到，唔知點解。
仲有，我好似知道（記得）佢係邊個，但（佢）個樣開始變得好模糊，就連個名都好似記得，又好似唔記得。
師父，原來，人死，真係話都冇咁易，係完全冇防備之下話死就死。
而家諗返轉頭，有『早知今日，何必當初』嘅諗法。好後悔自己唔識得做人，好後悔自己咁貪心。如果當時自己唔係咁貪心，唔係咁爛賭，唔會就咁冇咗條命，（而家諗返）覺得好唔值得。
多謝 二哥提醒，叫我講嘢直接啲、簡單啲，師父（好忙）無咁多時間。
師父啊！如果有來世，我好想跟住 師父學道，好似 師父咁，四圍去幫人。
我好多謝萍姨，係佢幫咗我，（喺師父當時行開咗，我推）佢，將呢件事講咗出嚟，我終於可以沉冤得雪。感恩 師父！
師父！其實我跟住萍姨都有一段日子。可惜，每次見 師父嘅時候，我都只能夠距離幾條街，唔可以行咁近。因為，成日俾 護法菩薩趕。
師父，我唔會原諒佢（兇手），因為自己覺得死得好慘，冇可能原諒佢。但係聽到 師父講道理之後，明白咗一個道理，『冤家宜解不宜結』。
師父，好多謝你咁忙都俾機會我，聽我訴苦。感恩 祖師爺！感恩 二哥！感恩 菩薩！我今次得到呢個機會，希望真係可以解脫。但我知道，仍有一段時間要學吓修心。
師父，天氣涼咗，要加衣。師父，館門口外面，好多『人』等緊想見 師父菩薩。但係 護法菩薩唔俾佢哋入嚟。二哥話要有規有矩，唔好亂嚟。
（館門外）我見到一個，以前做電視嘅，佢都要等。師父，佢同我講代佢多謝 師父，『功德收到晒，多謝 師父！』
師父，『冤有頭債有主』，我今生慘死收場，其實係罪有應得。我以前（前生）喺販賣人口，無惡不作，專玩女人；唔合心意，就拳打腳踢，話知佢死，或死唔死得。
呢啲，都係 二哥帶我去睇返自己前生嘅所作所為，先至知道。我睇嘅時候唔信，睇完之後唔認。但 二哥好好，好有耐性解釋俾我聽，同我講如果唔信因果，好難得到呢個特赦嘅機會。
之後，我就諗，我信又好，唔信又好，就 二哥所講嘅『一切已成事實』。
師父，我而家咩都唔諗，好想求 師父幫吓我，我⋯⋯又想投胎，又唔敢再投胎，怕再遇到『冤有頭債有主』。
二哥同我講過，要俾心機學，首先要誠心懺悔。
師父，外面好多『人』想見 師父，我覺得自己好好彩，唔使排隊；唔係，係感恩 祖師爺同 二哥！感恩 守門將軍放我入嘅見 師父；俾我向 師父訴冤情！
師父，我會好好學，會學原諒人，會學真誠懺悔！多謝 師父，感恩 師父！
如果有來生，如果可以做人，如果可以跟住 師父，我心甘情願任由 師父使喚，我一定會俾心機學做人，俾心機學道嚟報答 祖師爺！報答 二哥同 菩薩，更加要好好報答 師父救命之恩！
多謝 師父！感恩 師父！
感恩 祖師爺！
感恩 菩薩！
感恩 二哥！
感恩 師父同然哥師伯！
感恩師兄師姐們！
南無阿彌陀佛」
14:36 畢
「師父啊⋯⋯我要返去啦！感恩 師父！多謝 師父！」
倀雞英合十拜退
⋯⋯
師父寄語：
做個自由人
其實，倀雞英，剛剛過去的這一生，心地不差，只是口直心快，容易得罪人而不自知。
從倀雞英自述死前及前生的事來看，我們更感到有緣學道學佛，是很有福報的事。
有緣學習真理和因果關係，學會惜福和感恩，才有機會改變命運，做個真真正正的自由人。
⋯⋯
事緣
2023.8.08 四川閬中酒店
晚飯後，維修師兄說起「打」靈體，說着說着，維修師兄跟萍姨說：「知妳識(啤牌)，就講吓有關『話事啤』嘅靈異事。」接着他便說出以前與朋友玩啤牌時遇到靈體的往事，說完之後，萍姨接續道出廿幾年前發生的事：
大約2000年左右，萍姨與友人在澳門十六浦加油站內打麻雀（打牌）耍樂，期間有一局開牌，四人同樣打了「西」，大家提出之後別接住打「一筒」*，但當事人（倀雞英）唔信邪，打出「一筒」。耍樂完畢大家各自歸家。
第二天，倀雞英在家被人綑綁，活活被火燒死。當時友人認為，由於倀雞英家門沒被弄破，故此懷疑是熟人所為。
萍姨說這命案當時好轟動，新聞都有報導。
據說倀雞英求生慾好強，被人綑綁火燒，仍掙扎跳落浴缸，希望用水淋熄身上火種，但是最後也不成功，活活被火燒死在浴缸中。
倀雞英被燒死時只三十多歲，兒子只八、九歲，單親家庭長大，倀雞英死後，兒子交由倀雞英朋友照顧。
命案至今仍未被偵破，成為「懸案」。
萍姨說當維修師兄講起賭的靈異事時，她就想起廿幾年前這件事。
*倀雞：倀粵音「caang4」； 倀雞， 形容潑辣粗野，絕不認輸，死撐到底，聲大夾惡，蠻不講理的女人。
*四人歸西：流傳於香港的都市傳說，指在打麻雀（打牌）時，如果連續三人打出「西」牌，下一人便別打「西」牌，若然再配上「一筒」，就會四人「一同歸西」（死亡）。
496 total views, 1 views today