2023年6月7日 16:08
鬍鬚整整齊齊，神清氣爽，腰子挺直如昔，個子高大的”他”寬容詳和。
「亞嫂，你好！
哈哈，真係得意，生勾勾*嘅時候，無偈傾*。唔係，係冇機會傾偈*。
死咗喇，瓜柴*喇， 隨時可以見面， 隨時可以傾偈。
係呀，亞嫂，就係喇！
死咗上去天堂，一個人都唔識。應該係話⋯⋯
（啊！）首先，多謝亞然送個花牌俾我，好靚，好鍾意。多謝你個徒弟仔，咁醒，真係無改錯名。一早送過嚟，霸返個靚位喎 ，哈哈！
係，咁嘅，亞嫂。首先，我想多謝我嘅前妻，佢對我真係好。可惜，我哋有緣無份。當然，中國人講嘅，『相嗌唔好口』，大家（做夫妻時）都有好多衝口而出嘅時候。但睇返轉頭，邊有夫妻冇嗌烚*㗎！
嘩，你咁忙，怕唔怕阻你？明知故問啊呵，嘻嘻！
師父，我跟你啲徒弟仔叫喇，咁樣先叫尊重嘅！
係， 師父，咁嘅，好得意，講真嗰句，（生前）我真係冇諗過，死咗（會）去邊，有冇天堂同地獄。但我就好信，中國人講嘅『過得人過得自己』，我呢一生人係調皮咗啲，但講真嗰句，好嘢*咩，我都有做㗎，不過唔會四圍講。衰嘢咩，都有做㗎，不過，唔係打家劫舍嗰種，只係玩吓人*，攪吓鬼*。玩吓啫，邊個冇啊！
係，講返，一走，死咗，伸直咗，真㗎，真係會伸直，一𨅝*，玩完。
好快，我就騰雲駕霧，上咗去。（天堂）一個人影都冇。（等咗一段時間）遠遠見到兩三個人，分開見到嘅。戇居居咁，我就行吓企吓，再行吓⋯⋯
之後，終於見到個friend，佢微笑，揮手，走上嚟，微微點頭，示意跟佢行。我就跟住呢位女士，行行行，行咗去一個好似大堂嘅露天空間，有幾條柱（圍住），好大，白色，好粗身，柱有一條一條直紋（凸出）。即係話，條柱有設計嘅。
大約，（近近哋睇到嘅）有三、四條柱。周圍好白淨，好仙氣咁。我知喇，係天堂。係喇，就係咁喇。
嗰位女士，（生前）其實我同佢唔算係好熟，只不過大家都係葡國人，熟口熟面，有時喺啲特定場合，都會見到面，所以，相識一場，算係朋友咁喇。好似我同亞嫂、 師父你咁，（笑着）我哋都係朋友，喺咪？
嘩，原來，亞然都幾乖仔㗎噃，學人鈔經㖭。我唔係笑佢，係唔知道佢咁乖仔啫，抵讚！
亞嫂， 師父，我想話呢，如果有機會，真係想見吓你哋 祖師爺！睇吓係何方神聖，咁勁嘅！係真心想拜會一吓，認識一吓。點解？唔使講啦係嘛！
講返，天堂，我去過喇，去咗喇，好正。但要適應期，真係唔慣，人影都唔多個。地獄呢，如果有機會，我都想去行下，見識吓，睇吓啫，聽就聽過，唔知真實係點嘅。
當然，你大佬（ 二哥先師）話：『唔係想去就去到。』
師父，唔阻你寶貴時間，我想襯*呢個機會，多謝（先）亞叔，俾咗好多機會我哋兄弟，好錫我哋，只係，緣份啩，又或者係我哋（當時）年少氣盛，唔爭氣，唔識珍惜。好彩，亞叔最後都原諒咗我哋，多謝亞叔！
多謝呢一生遇到過嘅所有人，當然包括我嘅家人同好朋友。
『生果仔，好自為之，執生啦！都係，多謝生果仔，我哋曾經創造過嘅傳奇，真係諗吓都好開心，覺得好威水。但，咁又點呀，都成為過去，係咪？祝生果仔開開心心，健健康康！』
仲有，亞然，雖然，我同你唔算係深交，但，多謝你，因為你，所以我識得亞嫂、 法玄師父！多謝 法玄師父嘅功德迴向，收到晒，多謝晒！來生，我相信，我哋會再相遇，真嘅，我希望，好希望！
仲有，多謝 師父嘅徒弟仔！多謝當日嚟我Party*同送花牌俾我嘅所有人！我一個個花牌睇過，（心底即時）好多謝大家咁有心！多謝當日幫我做殯儀嘅所有人，最後，要多謝我今生遇到嘅所有人，多謝晒！
如果曾經辜負，請原諒！如果曾經傷害，請原諒！
如果，可以報答，就只有真切嘅：祝福！
多謝！多謝！多謝！」
17:08
生勾勾：活生生、很精神。
無偈傾：不交談。意即沒有交談的共同話題或理由。又暗指二人不交心，沒有「相同語言」，話不投機，不會有交流。
傾偈：交談。
嗌烚： 鬧交，意見不合而引致激氣的對話甚至衝突。
瓜柴：香港地道俗語。香港人都明白這俗語所指的意思，「人死了」是「『老襯』已『瓜』」，即是「瓜老襯」。人「瓜」了，身軀成為屍體，屍身僵直像條「柴」枝，所以就有「瓜柴」的講法。
好嘢：好事。
玩吓人：跟人開玩笑，捉弄人。
攪吓鬼： 整古做怪。
𨅝：用力伸直對腳。
襯呢個機會：襯，藉着，利用。意思是把握住這個機會。
Party：慶祝、聚會。這裡指的是舉行殯儀儀式當日的聚會。
248 total views, 1 views today