2022年10月31日 11:40
「法玄師父，係我！
3年前，喺新馬路，唔係，係南灣，殷王子馬路見過 師父。 師父身發金光，行路好快，走路似風。當時我企喺政府大樓樓下，挨住條柱企喺度。突然， 師父走過，我仲懵吓懵吓咁，醒覺嘅時候， 師父已走到好遠。我對眼突然瞪大，大咗好幾倍咁，儍吓儍吓咁。真係醒一醒嗰時，發覺 師父無影無蹤。想跟住個方向試吓搵，原來想吓就得，唔係咁易再遇。
我當時有啲唔開心，應該係話好失望，點解自己咁唔爭氣，咁難得機會被我碰上，話失去就失去。
當然，嗰時真係唔知你係乜水。對唔住，真係無禮。唔係，係我真係有眼不識泰山，唔知當時見到嘅係何人。我一個俗人老粗，唔識講嘢，只係而家講番當時嘅情景同心境。但講真嗰句，無乜機會見到嘅金光，突然嚇呆咗，醒一醒都蘇州過後冇艇搭。無偈，時辰未到。
師父，後來點解我會『識 師父』呢？話說，好似做戲咁⋯⋯
我（當時） 搵唔番 師父，都行咗附近幾條街，都搵唔到，都要接受現實。但所謂接受現實，其實唔係心甘情願嘅。（同自己講）咁又點呀？都無得勉強㗎！係有啲沮喪嘅，但又諗深一層，真有一線生機，見得一次，無理由無第二次見嘅。當時真係咁諗。
但，原來，真係點都諗唔到，無得再見就係無得再見，唉！
師父，說來話長，好似好簡單嘅事，對一啲人嚟講，原來絕對唔簡單。
師父呀，我好慘㗎！我都唔知自己點死、幾時死，係一啲記憶都無咗。淨係成日喺條街度行來行去，都唔知過咗幾耐，開始有啲諗法，覺得有啲唔對路（先知道原來自己已經死咗）。
（我喺度諗）點解條街無咩人，咁靜嘅？點解個天成X日黑X 鼆鼆(粵音蚊蚊)嘅？對唔住， 師父，（我講粗口）死性不改，整污糟 師父耳仔！對唔住！對唔住！
到我儍吓儍吓咁，開始諗點解嘅時候（一段日子），開始見到啲同類（已離世嘅人）。我哋都係各有各儍吓儍吓咁、 戇居居咁。又過咗一段時間，唔記得幾耐，唔知幾耐，我哋啲同類人，應該係話我哋人唔似人，鬼唔似鬼，成日喺條街度流離浪(粵音朗)盪，不知時日。
慢慢，有啲同類人開始熟口熟面，成日見來見去都係嗰幾個（想講嗰幾條友仔）。師父，我係咪叻咗呢？忍住，唔講粗俗話（微笑）。
師父，我哋有幾個，開始見到面都會有反應，當係打咗招呼。意思係話，唔會點頭或者揮手，唔知點解。之後，又過咗一段時間，開始，有一兩個『老友記』，我哋間中會噏吓嘢（聊天）。 師父，我又义開咗話題，對唔住。
係， 師父，係咁嘅，因為等呀等，揾呀揾，始終都無再見番 師父，當然係好失望啦！但無偈㗎，都要接受喇！連自己原來死咗，唔知點死、幾時死、死咗幾耐都唔知，到知道又接受咗，因為無得唔接受。
即係咁嘅 師父，話說始終冇機會再見番 師父，都有啲心有不甘嘅。但係現實再殘酷，唔接受，只會覺得自己真係好慘，慘到無倫。之後，有一日，我哋幾條友仔（連同這善靈共三個靈體）四圍行，冇目的嘅。行行下，見到一個少少肥肥地，又矮矮地嘅老女人。佢身上發出一啲光，同之前我見過嘅（ 師父您）光有啲似似哋。當然，係差好遠啦，無十萬九千七丈，都真係有一大段距離。我當時都唔理咁多，拍兩嘢啲friend（同行兩個靈體），講都無講嘢，即刻（一齊）跟上去。
行吓行吓，行咗幾條街，轉彎抹角，到咗一條街。我哋（喺樓下幾座大廈相隔）見到樓頂有金光，幾個都呆咗，企喺度你眼望我眼。但嗰時，我感覺啲光好熟悉，覺得就係我之前見過嗰啲一樣。
師父，係咁嘅，唔知點解，死咗之後，留低咗，無去報到，都係喺一處呆等，唔知等咩。
我哋喺樓下，都唔敢行咁近 師父間大廈，遠遠（喺對面街）企喺度，企吓企吓，有個長長白鬚公，着住白色長袍，揸住（深啡色）拐杖，完全唔係我哋年代嘅人咁，十足十粵語長片嘅土地公。佢，土地公，土地公公，件白色長袍都係發光嘅，光度就好似做咗特效咁，成件衫，件袍，光光亮亮，好耀眼嘅白光，有成呎咁（厚嘅光），包住個人（土地公），連鬚都係透出仙氣嘅光亮白。
土地公公好友善，微微笑同我哋講，你哋唔好喺度等喇，你哋唔會咁易見到嗰位 師父嘅。（又話） 法玄師父唔係四圍去，好少外出，你哋喺度等都無用，就係見到，都埋唔到身嘅，有護法（隨行守護 師父）呀嘛！番去啦！再企落去，有人（護法菩薩）嚟執你哋番去㗎喇，走喇！
我（當時）唔明，就問土地公公⋯⋯
土地公公好慈祥，微微笑住講，『種善因得善果』，番去好好修啦！做得好，修得好，自然會有機會嘅！走喇，走喇！
師父，對唔住，令到 師父咁攰！我哋等咗好耐，終於等到，有一個，一位，叫做 二哥嘅菩薩，叫我哋俾心機學，要乖乖哋，唔好攪攪震，千祈唔好攪事，機會錯過咗就有排等。
隔咗一段日子，有個叫阿德嘅嚟，同我哋講， 二哥（菩薩）話你哋要繼續做好啲， 師父有機會隨時會見你哋，好自為之。
師父，就係咁，今日，我哋突然接到通知，可以同 師父連線。多謝 師父！感恩 法玄師父！
師父，我唔記得自己叫咩名，唔記得自己住喺邊、有冇家人，唔記得自己點樣死，死嘅時候幾歲。咩都唔記得，一啲啲印象都無。哎！係，可能我喺吸毒，吸得犀利，又俾人仆個頭仆死？唔知。
師父，同得一齊嚟見 師父嘅，一個叫文傑37歲，一個阿叔佢又係話好（似），都係生前嘅嘢都唔記得哂。我哋好多謝 師父，收咗 師父功德，我哋好好彩，而家一齊去報到。我哋三個講過，生前互不相識，死咗，喺街度企吓企吓，識咗，唔死唔相識，真係死咗都得啖笑，真係識咗個死黨，千真萬確嘅死黨（露齒，無奈的笑）。我哋幾個講，報到之後，有機會投胎，做親兄弟就好喇，唔得都做死黨啦！但係唔想做黑社會份子，唔想再偷呃拐騙，唔想姦淫擄掠。
多謝 師父！感恩 師父！
感恩 祖師爺！
感恩 菩薩！
感恩 二哥！
感恩 師父嘅家人同徒弟！
師父，請保重，有緣，想再見到 師父，喺陽間又好，唔敢奢望喺淨土。但目標好清晰， 二哥教咗我哋，如果目標唔清晰，唔清淨，見到 師父都無用，甚至未必排到隊見 師父，係咁先。所以， 師父，我哋呢三個死黨，咁好彩，可以死咗都做到知心朋友，如果能夠做人，又入道門，真係會好好咁修，先至可以報答 祖師爺同 師父，同埋（報答） 二哥菩薩、 土地救命之恩！千多萬謝！
南無阿彌陀佛」
一前二後三位善靈合十躬身拜退
14:20畢
530 total views, 3 views today